పిచ్చపిచ్చగా లైట్ తీసుకో !

ఇదే మన తెలుగు న్యూస్ ఛానెళ్ల భాష.

వీటీకి ఆదిగురువు...వేరే చెప్పక్కర్లేదనుకుంటా, అదేనండీ మన నిరంతర వార్తా స్రవంతి TV9.

ఆ మధ్య ఎప్పుడో నా ఖర్మ కాలి అందులో ఏదో దిక్కుమాలిన ప్రోగ్రాం చూసాను. అందులో వాళ్ళ భాష మహ కనికిష్టం.

" ఇవాల అక్కడ పబ్లిక్ పిచ్చ పిచ్చ గా ఎంజాయ్ చేస్తున్నారు"

"జరిగిందేదో జరిగింది అనుకుని జనాలు లైట్ తీసుకున్నారు"

ఇవి వింటుంటే నాకు చెవుల్లో ఆముదం పోసినంత బాధగా అనిపించింది.

పిచ్చ పిచ్చగా, లైట్ తీసుకో అన్న పదప్రయోగాలు చూసి నివ్వెరపోయాను. ఈ పదాలు మనం సరదాగా, మన స్నేహితులతో అంటూ ఉంటాం. వాటిని తీసుకొచ్చి తమ ప్రోగ్రామ్ముల్లో వాడితే జనాల్లోకి దూసుకుపోవడం అనుకుంటున్నారు కాబోలు ఆ సదరు టివివారు.

ఈ మధ్య నా దురదృష్టం పుచ్చిపోయి జెమిని వార్తలు వినాల్సిన అగత్యం ఏర్పడింది. ఆ సదరు మహాతల్లికి "విద్యార్థి" అనడం రాదు. అరగంటసేపు చదివిన వార్తల్లో ఓ 10-15 సార్లు విద్యార్థి అన్న పదం వచ్చి ఉంటుంది. అన్నిసార్లు ఆవిడ "విధ్యార్థి" అని అంటూనే ఉంది. ధ కి ఒత్తులేదన్న విషయం సదరు పఠకురాలికి తెలియదనుకుంటాను. సరే, ఆ రోజు పొరపడినట్టున్నారు మర్నాడు సరి చేసుకుంటారని ఆశపడ్డాను. ఆ ఆశ అడియాశ అని ఋజువయింది. వరుసగా నేను చూసిన మూడు రోజులు ఆవిడ విధ్యార్థి అనే చదివింది. చెవుల్లో చీమలు దూరినట్టు అనిపించింది.

వీళ్లకి ఎక్కడ ఒత్తు పెట్టలో, ఎక్కడ పెట్టకూడదో తెలీదు.

"సంబంధం", "భేదం" "బాధ" లాంటి పదాలు వారి నోట పడి మనకు కడు ఖేదాన్ని కలిగిస్తాయి. "ళ" పలకడం రాదు. వీల్లకి, వాల్లకి, నీల్లు అంటారు.

ఇంకొక ఉదంతం TV5లో...."సంభ్రమాశ్చర్యాలు" అనేది మాహా కష్టమైన పేద్ద పదం ఆ సదరు పఠకుడికి.

ఆయనగారు సంబ్ర్ సంబ్ర్ సంభ్రమాశ్చర్యాలు అని చదివారు.

ఇదేమిటి పాటలే రీమిక్సు అనుకున్నాను ఇప్పుడు మాటలు కూడా రీమిక్సు చేస్తున్నారా అని హాశ్చర్యపడ్డాను.

(మొన్ననే పాడుతా తీయగా లో SPB "కడవెత్తుకొచ్చింది కన్నెపిల్ల అనే పాటని రీమిక్సు చెయ్యకుండా మనమీద దయతలచి వదిలేసారు మహానుభావులు, లేదంటే కడవెత్ కడవెత్ కడవెత్ కొచ్చి కొచ్చి కొచ్చి అని మొదలెడతారు ఈ లోపల కడవ పగిలిపోతుంది" అన్నారు.)

అలాగే సంబ్ర్ సంబ్ర్ సంభ్రమాశ్చర్యాలు అంతే అదేదో రీమిక్సు మాట అనుకున్నాను.

నోరు తిరగకపోతే ఏం దొరా మేమే తిరుగుతాం (మాయాబజార్ డైలాగు) అన్నట్టు ఆ ముక్క పలకడానికి అష్టవంకర్లు తిరిగాడు మహానుభావుడు.

ఏమాటకామాటే చెప్పుకోవాలి. ఈటీవి లో ఈ బాధ చాలమటుకు లేదు. ఈటీవీలో వచ్చే వాళ్ళందరు వార్తలు బాగా చదువుతారు. వాళ్ల ఉచ్చారణ, పద్ధతి అన్నీ బాగుంటాయి. 99 శాతం మంచి తెలుగులోనే వార్తలు చదువుతారు. అడపాదడపా 2-3 ఇంగ్లీషు పదాలు దొర్లినా, అవి తెలుగులోకి మార్చబడనివో, మార్చబడలేనివో అయి ఉంటాయి. ఈ విషయంలో మాత్రం ఈటివి వారికి జోహార్లు !

క్రితం నెల ఉగాది రోజున సాయంత్రం మన తెలుగువాళ్ళు ఒకానొకచోట వేడుకలు జరుపుకుంటూ ఉంటే ఆహ్వానితులుగా వెళ్ళాము. ఎవరో కూచిపూడి చేస్తూ ఉంటే నిమగ్నమయిపోయిన నా ముందుకి ఒకతను వచ్చి "మేడం ఉగాది గురించి మాట్లాడతారా?" అన్నాడు. ఎందుకు,ఎక్కడ అని అడిగాను. మేము న్యూస్ ఛానెల్ నుండి వచ్చాము. ఇక్కడ మన పండగ జరుగుతోంది కదా, దీనిపై మీ అభిప్రాయాన్ని చెప్పండి అన్నాడు. ఇంత అచ్చ తెలుగులో అడగలేదనుకోండి. ఉగాది ని సెలెబ్రేట్ చేసుకుంటున్నారు కదా దానిపై మీ ఒపీనియన్ చెప్పండి అన్నాడు. సరే మన ఉగాది గురించి మనం కాకపొతే ఇంకెవరు మాట్లాడతారని ముందుకెళ్ళాను. ఒక 5-6 మైకులు నా నోటి ముందుకొచ్చాయి. TV9, TV5, HM, i news, జెమిని ఉన్నాయి. కెమెరా ఆన్, షాట్ రెడీ అన్నారు. మనం గొంతు విప్పి గడ గడ ఐదు నిముషాలు మాట్లాడేసాం. ఉగాది పండగ గురించి, ఉగాది పచ్చడి ప్రాశస్త్యం గురించి వివరించి నాలుగు ముక్కలు చెప్పేసాను. అయిపోగానే TV5 నుండి వచ్చిన రిపోర్టరు "ఏకసంతాగ్రాహి" ఎలా మాట్లాడేసారో అని తెగ హాశ్చర్యపోయాడు. నాకు ఒక్క నిముషం అర్థం కాలేదు. నేను ఏమి చదవలేదు, వినలేదు, ఏకసంతగ్రాహినెలా అయ్యానబ్బా అని ఆలోచిస్తే తెలిసిన విషయమేమిటంటే వాడికి "అనర్గళం" అన్న పదం తెలీదు అని. అనర్గళంగా మాట్లాడేసారు అనడానికి బదులు ఏకసంతగ్రాహి అన్నాడు. వాడికి అనర్గళం అన్న మాట తెలియకపోగా ఏకసంతగ్రాహికి కూడా అర్థం తెలీదు.

అదండీ విషయం, వీటన్నిటినీ మనం పిచ్చ పిచ్చ గా లైట్ తీసుకుని మన తెలుగు బ్లాగులలోనైన చక్కని తెలుగు ఉపయోగిస్తున్నందుకు సంతోషిద్దాం, ఏమంటారు?