StatCounter code

Tuesday, May 31, 2011

నేను, నా పుస్తకాల గోల

పుస్తకాలు చదవడం ఒక మంచి అలవాటు (హాబీ) అని చిన్నప్పటినుండీ పెద్దలు చెబుతూనే ఉంటారు. కానీ అదేంటో నాకు ఈ అలవాటు కానేలేదు చిన్నవయసునుండీ. పెద్దనాన్నగారు చెప్పే పద్యాలు అలాగే నేర్చేసుకుని తిరిగి ఒప్పజెప్పడం తప్ప పుస్తకాలు చదివిన పాపాన పోలేదు. చిన్నవయసులో చందమామ పుస్తకాలు మాత్రం విపరీతంగా చదివేదాన్ని. అవి తప్పితే వేరే పుస్తకాలు ముట్టుకుంటే ఒట్టు. అసలు అంతంత పెద్ద పెద్ద పుస్తకాలు ఎలా చదువుతారో బాబోయ్ అని భయమేసేది నాకు. క్లాసు పుస్తకాలు చదవడానికే బద్దకంగా ఉండేది ఇంక జనరల్ రీడింగ్ ఎక్కడేడిసింది!మా ఇంట్లో రకరకాల పుస్తకాలు ఉండేవి మా కుటుంబంలో అందరికీ చదవడం బాగా అలవాటు. నేను వీళ్ళ మధ్య తప్పబుట్టానేమో అనుకునేదాన్ని ఒక్కోసారి. :(

మా ఇంట్లో అందరూ శ్రీపాద సుబ్రహ్మణ్యశాస్త్రి గారికి పంఖాలు. ఆయన పుస్తకాలన్నీ ఇంట్లో ఉండేవి. సరే మరీ ఇంతలా చెబుతున్నారుగా ఓపాలి చదివి పడేస్తే పోలా అని తొమ్మిదో తరగతిలో మొదలెట్టా "వడ్లగింజలు"...బ్రహ్మాండంగా అనిపించింది....గుక్కతిప్పుకోకుండా చదివేసాను (అప్పట్లో నాకు కళ్ళతో కాకుండా, శబ్దం బయటికి రాకుండా నోటితో చదివే అలవాటుండేది). తరువాత "మార్గదర్శి" చదివాను....అమృతకలశం...వడ్లగింజలకంటే బాగా నచ్చింది. అంతే ఇంక పుస్తకాలు చదవాలన్న తృష్ణ పెరిగింది. "శ్రీపాద కథలు" రెండు భాగాలు ఎకాయెకిని చదివేసాను. నేను పుట్టకముందు రంగనాయకమ్మ గారి స్వీట్ హోమ్ ఆంధ్యజ్యోతిలోనో ప్రభలోనో సీరియల్ గా వచ్చేదిట. ఆ కాగితాలు చింపి బైండ్ చేసి ఒక పుస్తకంగా కుట్టి ఉంచారు మా ఇంట్లో. అది "స్వీట్ హోమ్ పార్ట్-2"...పెద్ద పుస్తకం. అది చదవడం మొదలెట్టా..విపరీతంగా నచ్చేసింది. తరువాత చేతికి దొరికినది చలం "స్త్రీ"...అప్పటికి నేను పదికి వచ్చాను. స్త్రీ చదివి వెర్రెక్కిపోయాను..అప్పటికి చలం బతికున్నాడా లేడా, చలం ఎవరు అన్న స్పృహ లేదు నాకు. చలం ఎక్కడ ఉన్న ఓసారి వెళ్ళి కలిసిరావాలని అనిపించింది స్త్రీ చదివాక. ఆ తరువాత విశ్వనాథవారి "హాహాహూహూ" పుస్తకం మా అత్త వాళ్ళింట్లో కనిపించింది..బలే గమ్మత్తైన కథ..ఓ దేవతాశ్వం, అది కిందకి దిగి రావడం...బలే వింతగా ఉంటుంది. కొత్తగా, సరదాగా, ఆలోచింపదగినదిగా అనిపించింది అప్పట్లో. చాసో గారు మా ఊరే కదా మా కుటుంబానికి చాలా పరిచయం...మా ఇంటికి కూడా వస్తుండేవారు. నాకు చిన్నతనం కాబట్టి పెద్దగా పరిచయం ఉండేదికాదు. మా ఇంటికొచ్చినా నేనెప్పుడూ ఆయనతో మాట్లాడలేదు. ఓసారి మా నాన్నగారు నన్ను, ఆయనకి పరిచయం చేసారు. అప్పుడు ఆయన సంతకం చేసిన కథల పుస్తకం ఒకటి బహుమతిగా ఇచ్చారు నాకు. అందులో "కుంకుడాకు" మాత్రమే చదివాను. తరువాత యండమూరి "తులసీదళం"...ఇది కూడా ఏదో సంచికలో సీరియల్‌గా వచ్చేది. దాన్ని కూడా కుట్టి బైండింగ్ చేసి పెట్టారు మా ఫ్రెండు వాళ్ళింట్లో. తనదగ్గరనుండి తెచ్చుకుని అది మొత్తం చదివాను. ఓసారి మా నాన్నగారు, నాకు రూట్స్ తెలుగనువాదం "ఏడు తరాలు" కొని ఇచ్చారు. అది ఎంత హృద్యంగా అనిపించిందంటే...చదువుతూ ఎన్నిసార్లు కళ్లనీళ్లు పెట్టుకున్నానో నాకే తెలీదు. మనసుకి హత్తుకుపోయింది ఆ పుస్తకం. వేదుల సత్యనారాయణ శర్మ గారు రాసిన "ఆర్య చాణక్య" చదివాను...అద్భుతమైన కథనం...చాలా ఉత్తేజపరిచింది ఈ కథ. ఇంక అంతే, పదికొచ్చేసానుగా పుస్తకాలు పక్కన పడేసి క్లాసు పుస్తకాల మీద పడ్డాను...పై చెప్పినవన్నీ నా అంతట నాకు బుద్ధి పుట్టి చదివిన మొట్టమొదటి పుస్తకాలు. వీటిని ఈ జన్మకి మరచిపోలేను.

చిన్నప్పటినుండీ పద్యాలు అనర్గళంగా చెప్పే అలవాటు మాత్రం అబ్బింది. దాంతో భారత, భాగవత, రామాయణాల్లో పద్యాలు బాగా నేర్చుకున్నాను. స్కూల్ లో పద్య పఠన పోటీలు పెడితే నాకే కచ్చితంగా ఫస్ట్ వచ్చేది. ఓసారి శతక పద్య పఠన పోటీలు పెట్టారు. "లలితసుగుణజాల తెలుగుబాల" అనే మకుటంతో ఉండే శతకం (ఈ పద్యాలు కరుణశ్రీ రాసారు) లో 100 పద్యాలూ కంఠతా పట్టాను. కానీ పోటీకెళ్ళేసరికి 85 మాత్రమే గుర్తు ఉన్నాయి...అయినా ఫస్ట్ నాకే. (సెకండ్ వచ్చిన అమ్మయి 56 పద్యాలే చెప్పింది). ఈ పద్యాలు నేర్చుకునే అలవాటు మా ఇంట్లో చిన్నపిల్లలందరికీ ఉంది. కాబట్టి మా పెద్దనాన్నగారు మా మధ్య ఒక పద్యపఠన పోటీ పెట్టారు. దానికోసమనీ నా పదవతరగతి సెలవుల్లో విరాటపర్వం మొత్తం బట్టీ పట్టాను. మా ఇంట్లో భారతం పర్వాలవారీగా ఒక్కో పుస్తకం ఉండేది. కాబట్టి విరాటపర్వాన్ని కూడ ఓ పుస్తకం గా లెక్కేసేస్తున్నా. :)

ఇంక అంతే, మళ్ళీ జనరల్ రీడింగ్ జోలికి పోలేదు. మా ఇంట్లో అందరూ "దీనికి పుస్తకాలు చదివే అలవాటు ఈ జన్మకి అబ్బదు, ఇది ఎందుకూ పనికిరాదు" అని నిర్ణయించేసుకునే సందర్భంలో మళ్ళీ మొదలెట్టాను ఓ నాలుగేళ్ళు గడిచాక...నా డిగ్రీ లో. కానీ తెలుగు కాదు. ఇంగ్లీషు నేర్చుకోవాలనే ప్రయాసతో Ayn Rand రాసిన "Fountain Head". మనకి వచ్చిన ఇంగ్లీషే అంతంత మాత్రం ఇంక అంత పెద్ద పెద్ద పుస్తకాలు కొరుకుడుపడాలంటే సాధ్యమా!...ఓ సంవత్సరం చదివా. తరువాత "Atlas Shrugged"...ఇది కూడా ఓ యేడాది పట్టింది. మాక్సీం గోర్కీ "అమ్మ" చదివాను...బావుంది కానీ ఏడుతరాలంత కదిలించలేదు.

ఇంకేముంది డిగ్రీ అయిపోగానే విజయనగరం వదిలేసి హైదరాబాదుకి చలో....HCU లో చేరాక పుస్తకాలు వగైరా మూలన పడేసి కెరీర్ అనుకుంటూ దానివెంట పరిగెత్తాను. మళ్ళీ ఏ పుస్తకం తెరవలేదు. మా HCU లో ఉన్న తెలుగు లైబ్రరీ లాంటిది నేనెక్కడా చూడలేదు. అసలు రెండు కళ్ళు చాలవు ఆ పుస్తకాలు చూడడానికి. కానీ నేనెప్పుడు అటువైపు పోనేలేదు. PhD కొచ్చాక...మూడేళ్ళు దాటాయి 2007కి...ఎంతకీ మా గైడ్ తెమల్చడు...నరకం చూపిస్తున్నారు. అసలు ఈ జన్మకి నా PhD అవుతుందా అని కళ్ళనీళ్లు పెట్టుకునేదాన్ని రోజూ. విసుగు, నిరాశ, నిస్పృహ, విరక్తి ఇలాంటివన్నీ కలిగి ఏమి చెయ్యలో తెలీదు. నాతోటివారికి చెప్పుకుందామా అంటే ఇంచుమిందు వారూ అదే పరిస్థితిలో ఉంటారు. పెద్దవారికి చెబితే PhD యా మాజాకా, అలాగే ఉంటుంది, తట్టుకోవాలి అన్నీ అంటారు. ఇక ఎటూపాలుపోక పుస్తకంలో తలదూర్చాను. లైబ్రరీకెళ్ళి "కన్యాశుల్కం" తెచుకున్నాను. ఆపాకుండా చదివాను. ఎంత నచ్చేసిందంటే ఇన్నాళ్ళు ఆ పుస్తకాన్ని పూర్తిగా చదవనందుకు ఎన్ని సార్లు నన్ను నేనే తిట్టుకున్నానో చెప్పలేను. మా ఇంట్లో ఉండి కూడా ఎప్పుడూ చదవలేదే అని తెగ బాధపడిపోయాను. ఏకబిగిన చదివేసి మొత్తం పూర్తిచేసాను. సంతృప్తి కలగలేదు, మళ్ళీ మొదటి పేజీ నుండి మొదలెట్టాను. అలాగే ఏకబిగిన చదివాను. ఇప్పటివరకూ ఒకే పుస్తకం వరుసగా రెండు సార్లు చదవడం అన్నది కన్యాశుల్కం విషయంలో మాత్రమే జరిగింది. ఇంకే పుస్తకం అలా చదవలేదు. ఆ తరువాత చలం ది "సత్యం, శివం, సుందరం" తీసాను. అప్పుడు పట్టింది నాకు చలం పిచ్చి...దాదాపు ఆయనవి అన్నిపుస్తకాలు ఉన్నాయి మా లైబ్రరీలో...ఒక్కోటి చదవడం మొదలెట్టాను. కొన్ని వీపరీతంగా నచ్చాయి. కొన్ని కొంచం నచ్చాయి, కొన్ని అస్సలు నచ్చలేదు, ఇంకొన్ని చిరాకేసాయి. కానీ వాటిని ఎలా విశ్లేషించుకోవాలో తెలియలేదు. అప్పుడు రంగనాయకమ్మగారి "చలం సాహిత్యం" పుస్తకం చదివాను. అది చదివాకే చలం ఇంకా బాగా బోధపడ్డాడు అని చెప్పగలను. అలా RN పుస్తాకాల మీద పడ్డాను. స్త్రీవాద రచనలు బాగా నచ్చాయి. మార్కిజం పాళ్ళు ఎక్కువవుతున్నకొద్దీ కొద్దిగా బోర్ కొట్టాయి.


ఇంక అక్కడమొదలయింది నా పుస్తక పఠన ప్రవాహం. ఒకటేమిటి విశ్వనాథ వేయిపడగలు, శ్రీరమణ మిధునం, పేరడీలు, హాస్యజ్యోతి, కథలు...అన్నీ, ముళ్ళపూడి రమణీయాలు అన్నీ, కొ.కు చదువు, వ్యాసాలు, నామిని పచ్చనాకుసాక్షిగా, మిట్టూరోడి కథలు, పానుగంటి వారి సాక్షి వ్యాసాలు, తిలక్ కథలు, శ్రీపాద క్షీరసాగర మధనం,పుల్లంపేట జరీచీర,అనుభవాలు-జ్ఞాకపకాలు, ఆరుద్ర రచనలు కొన్ని, యండమూరి యుగాంతం, భ.రా.గో రచనలు, గోపీచంద్ అసమర్థుని జీవయాత్ర, ఇరావతీ కర్వే యుగాంతం, గురజాడ దిద్దుబాటు, భానుమతి అత్తగారి కథలు, నాలో నేను, మొక్కపాటి బారిస్టరు పార్వతీశం, మల్లాది కృష్ణాతీరం,శ్రీదేవి కాలాతీతావ్యక్తులు....ఇలా లిస్ట్ చెప్పుకుంటూ పోతే రెండు టపాలు అవుతాయి...అలా చేతికి ఏది దొరికితే అది చదివేసాను. అలా చదవడం వల్ల నాకు ఎలాంటి భావనలు నచ్చుతాయి, ఎలాంటివి భరించలేను అన్న లైన్ క్లియర్ కట్ గా బోధపడంది. ఇలా చదవడమే కాకుండా విశాలాంధ్ర పై దాడి కూడా చేసాను. నచ్చిన పుస్తకాలన్నీ కొనేసుకున్నాను. కోటీలో విశాలాంధ్ర exhibition ఉంటుంది ఎప్పుడూ. అక్కడ 10% ఆఫ్ ఇస్తాడు. మొదటిసారి వెళ్ళినప్పుడు బోల్డు పుస్తకాలు కొనేసాను రూ. 1000 రూపాయలయింది. ఆ పుస్తకాలు యూనివర్సిటీకి ఎలా తీసుకెళ్ళాలన్నది సమస్య. కోటీలో పెద్ద బేగు కొని అందులో అన్నీ నింపేసి తీసుకెళ్ళాను. కేంపస్ లో అడుగుపెడుతుంటే అందరూ ఏంటి ఊరెళ్ళి వస్తున్నావా అని పలకరించారు. :D ఇంక అప్పటినుండీ ప్రతీ ఆదివారం కోటీ కి ఆ బేగుతో వెళ్ళడం రూ. 1000-1500 రూ వరకూ పుస్తకాలు కొనడం. విశాలాంధ్రవాడు సంతోషం పట్టలేక నాకు 15% ఆఫ్ ఇచ్చేవాడు. తరువాత అది 18% పెంచాడు. ఓరెండు వారాలు నేను వెళ్ళకపోతే నాకు ఫోన్ చేసి 'ఏంటి మేడం మీరు రావట్లేదు' అని అడిగేవాడు. :D ఏదైనా పుస్తకం లేకపోతే నాకోసం తెప్పించేవాడు. చలం పుస్తకాల కోసం అతన్ని పెట్టించిన పరుగులు అన్నీ ఇన్నీ కాదు. ప్రింట్ లో లేని పుస్తకాలు కొన్ని వాళ్ళ గోడౌన్ లో ఎక్కడో పడి ఉంటే అవి వెతికి మరీ తెప్పించుకున్నాను. ఎప్పుడు ఖాళీ దొరికినా ఆ exhibition కి వెళ్ళి ఏదో ఒక్కటైనా పుస్తకం కొనకుండా బయటకి వచ్చినది ఏనాడూ లేదు. చివరికి PhD అయిపోయాక ప్రత్యేకంగా వాడిదగ్గరకెళ్ళి స్వీట్స్ ఇచ్చి ఇంకో నాలుగు పుస్తకాలు కొని మరీ వచ్చాను. అలా ఆ యేడాది మొత్తం పుస్తకాల మీదే గడిపాను. ఓ 6-7 వేల దాకా పుస్తకాల మీద ఖర్చుపెట్టాను. ఆ మొత్తం సంవత్సరం PhD అన్నది పట్టించుకోలేదు. పూర్తిగా పక్కన పెట్టేసాను. ఆ తరువాత మా గైడ్‌ ఎందుకో, ఏమిటో దారిలోకొచ్చి నన్ను పట్టించుకోవడం మొదలెట్టారు. ఇంక అప్పటినుండీ నేనూ ఈ జనరల్ రీడింగ్ పక్కనపెట్టేసి సీరియస్ గా రిసెర్చి చేసాను. అంతే మళ్ళీ వదిలేసాను పుస్తకాలని. (మధ్యమధ్యలో యండమూరి నవలలు, యద్ధనపూడి సులోచనారాణి నవలలు కొన్ని చదివాను. కానీ ఏదో కాలక్షేపానికే).

ఇదిగో ఇప్పుడు ఈ మధ్యనే మళ్ళీ మొదలెట్టాను. ఎలా అంటే...రోజూ ఆఫీసుకి మెట్రోలో వెళ్ళేటప్పుడు 20-25 ని. వచ్చేటప్పుడు 20-25 ని. ప్రయాణం చెయ్యవలసి ఉంటుంది. మొదట్లో ఆ ప్రయాణం కొత్త కాబట్టి ఆ టైములో వచ్చేపోయేవారిని గమనిస్తూ ఉండేదాన్ని. తరువాత కాస్త బోర్ కొట్టి పాటలు వినడం మొదలెట్టాను అదీ బోర్ కొట్టాక ఆ 20 ని. ఏదో పెద్ద ప్రయాణంలాగ అనిపించడం మొదలెట్టింది. మామూలుగా దూరప్రయాణాలలో పుస్తకం చదువుకునే అలవాటుంది, అదే ఇక్కడ ఎందుకు మళ్ళీ మొదలెట్టకూడదూ అనిపించింది. మెల్లిగా మొదలెట్టాను. ఈసారి కాస్త ఇంగ్లీషు పుస్తకాలు కూడా చదువుదామని నిర్ణయించుకున్నాను. గత మూడు నెలలలో నేను పూర్తి చేసిన పుస్తకాలు

1.చదువులా చావులా - నామిని
2. The White Tiger - Aravind Adiga
3. The Illustrated Brief History of Time, Updated and Expanded Edition - Stephen Hawking
4. సహజ - ఓల్గా
5. మానవి - ఓల్గా

'చదువులా చావులా' గురించి ఇంతకుముందే బ్లాగులో రాసాను.

'వైట్ టైగర్' చాలా ఎంజయ్ చేస్తూ చదివాను. డిల్లీ లో రెండేళ్ళుగా కారు డ్రైవర్ల పరిస్థితి గమనించి ఉన్నానేమో ఈ పుస్తకం అద్భుతంగా అనిపించింది. బీహార్ నుండి వచ్చే కారు డ్రైవర్ల దయనీయ పరిస్థితి, వారి మానసిక సంఘర్షణ. స్వేచావాయువులు పీల్చాలనే ఆరాటం...ఇవన్నీ చాలా బాగా చిత్రీకరించారు. అందరూ తప్పకుండా చదవవలసిన పుస్తకం. డిల్లీ పరిస్థితులు తెలిసున్నవాళ్ళైతే ఇంకా బాగా ఎంజాయ్ చేస్తారు.

నాకు ఫిజిక్స్ అంటే కొంచం ఆసక్తి. ఇంతకుముందే Brief History of Time చదివాను. ఇప్పుడు updated version వచ్చిందని తెలిసి వెంటనే కొని చదివేసాను. Stephen Hawking గురించి నేను కొత్తగా చెప్పేదేముంది...ఆ పుస్తకం చదువుతుంటే ఏదో వేరే ప్రపంచంలో ఉన్నట్టు అబ్బురంగా తోస్తుంది.

'సహజ', 'మానవి'..ముందుగా సుజాత (మనసులో మాట) గారికి బోలెడు బోలెడు ధన్యవాదములు ఈ పుస్తకాలు పంపించినందుకు. ఓల్గా వ్యాసాలు ఎప్పుడో చిన్నప్పుడు ఒకటి రెండు చదివానుకానీ దృష్టిపెట్టి ఎప్పుడూ చదవలేదు. ఈ పుస్తకాల గురించి తెలియజెప్పడమే కాకుండా వెంటనే పంపించినందుకు నేను సుజాత గారికి ఋణపడిపోయాను. రెండూ మంచి పుస్తకాలు....స్త్రీ చైతన్యం, హక్కులు ప్రధాన ప్రాతిపదికగా రాయబడిన కథలు...నాలో ఎన్నో ఆసక్తికరమైన ఆలోచనలను రేకెత్తించాయి.

తెలుగయితే 20 నిముషాలలో ఓ 30 పేజీల వరకూ అయిపోయేవి. ఇంగ్లీషు అయితే ఓ 15 వరకు అయ్యేవి. మూడునెలలలో ఐదు పుస్తకాలు చదివానంటే నాకే గొప్ప ఆనందంగా ఉంది.

ఇప్పుడు చదువుతున్నది Ideas and Opinions - Einstein. ఇది కొంచం కష్టంగా ఉంది...అయినా ఇష్టం గా చదువుతున్నాను. కాకపోతే కాస్త మెల్లిగా నడుస్తున్నాది బండి.

తరువాత లిస్ట్ లో ఉన్నవి.

1. విశ్వదర్శనం - నండూరి
2. Delhi - Kuswanth Singh
3. The Motorcycle Diaries (ఎప్పటినుండో చదవాలని అనుకుంటూ ఉన్నాను, ఇప్పటికి నా లిస్టులోకొచ్చింది).
4. చివరికి మిగిలేది - బుచ్చిబాబు (ఇది సగమే చదివాను, పూర్తిచెయ్యాలి).

ఇవి పూర్తయ్యాక మళ్ళీ కొత్త లిస్ట్ పెట్టుకుంటాను. చినవీరభద్రుడి కథలు , కా.రా కథలు చదవాలని కోరిక. తరువాతి లిస్టులో అవి ఉంటాయి. ఏది ఏమైనా అసలు పుస్తకాలు చదవడం అలవాటు లేని స్థాయి నుండీ మెల్లిమెల్లిగా లిస్టుగా పెట్టుకుని పుస్తకాలు చదివే స్థాయికి రావడం ఆనందంగా ఉంది. ఈ పుస్తకాలన్నీ నన్ను నేను మలుచుకోవడానికి ఎంతో తోడ్పడ్డాయి. ఎంతో మానసికోల్లసాన్ని కలిగించాయి. వీటినుండి ఎంతో నేర్చుకున్నాను. ఆలోచనా శక్తి అభివృద్ధి చెందింది. పరిశోధనాసక్తి పెరిగింది. కొత్త కొత్త విషయాలు తెలిసాయి. అంతర్గత భావాలను వ్యక్తపరచగలిగే సామార్థ్యం పెంపొందింది. భాష మీద పట్టు చిక్కింది. ఈ పుస్తకాలు నాకు నేస్తాలు....చిరాకులో, బాధలో నాకు తోడుగా నిలిచాయి, మరువలేని ఆనందాన్ని పంచాయి. ఈ పుస్తకాలే లేకపోతే నా జీవితంలో అతి ముఖ్యమైన ఒక భాగం లేనట్టే. గత రెండు మూడేళ్ళుగా ఎవరికైనా బహుమతి ఇవ్వాలనుకుంటే పుస్తకమే ఇస్తున్నాను. ఇది, ఇప్పుడు ఒక అలవాటుగా కూడా మారింది. వేరే బహుమతుల వైపు దృష్టి పోనేపోవట్లేదు. సందర్భానికి తగ్గట్టుగా ఏం పుస్తకం ఇద్దాం అని ఆలోచిస్తుంటాను. కానీ నేను చదివినవి ఏమీ కావు...ఇంకా ఎన్నో ఏన్నెన్నో ఉన్నాయి. ప్రతీసారి నేను ఈ పుస్తకం చదవలేదే అనిపిస్తే ఎంతో బాధగా ఉంటుంది. అవన్నీ ఎప్పుడు చదువుతానో ఏమో అనిపిస్తూ ఉంటుంది. ఈ జీవితకాలం సరిపోతుందా అని బెంగగా ఉంటుంది. కానీ నిరంతరంగా చదవడం తప్పించి చేయగలిగినది ఏమీ లేదు కదా!

Let books be your dining table,
And you shall be full of delights
Let them be your mattress
And you shall sleep restful nights.... అని ఎక్కడో చదివాను. ఇది నాకు బాగా నచ్చింది!



57 comments:

సుజాత వేల్పూరి said...

హమ్మయ్య, సహజ మానవి పుస్తకాలు నేను పంపించానని చెప్తావో లేదో అని బెంగ పడి చచ్చాననుకో!

నాకు చిన్న వయసునుంచే ఇంట్లో పుస్తకాల పిచ్చోళ్ళు ఉండటం వల్ల అన్ని పుస్తకాలూ అలవాటైపోయాయి. రంగనాయకమ్మ చలం మా ఇంట్లో ఒక షెల్ఫ్ లో మఠం వేసుకుని కూచుని ఉండేవాళ్ళు. అందువల్ల వాళ్ళిద్దరూ చిన్నప్పుడే తెలుసు. కానీ మహా మహా రచయితలందరికీ నేను కల్సుకోకముందే మోక్షం వచ్చేసింది. చాసో, శ్రీపాద,చలం, ఇలాగ! కుటుంబరావు గారు నాకు చాలా లేటుగా ఒక పన్నెండు పదమూడేళ్ళ క్రితం పరిచయం అయ్యారు. ఆయన్ని కలుసుకోలేకపోయాననే ఫీలింగ్ మాత్రం ఎప్పటికీ వదలదు నన్ను! అంత ఇష్టం ఆయన పుస్తకాలంటే! ప్రాణం అనుకో!

ఏడుతరాలు ఎవరినైనా సరే ఒక వూపు వూపేసి గింగిరాలు తిప్పి విసిరి కొట్టే నవల. అది ఇంగ్లీష్ వెర్షన్ చాలా పెద్ద పుస్తకం. అంత పెద్ద పుస్తకాన్ని ఇంత చక్కని తెలుగులో చిన్న పుస్తకంగా అనువదించినందుకు సహవాసి గారికి ఏమిచ్చి రుణం తీర్చుకోవాలో అనిపించేదినాకు.

పద్యాల్లో నీ ఘనాపాఠిత్వం ఇప్పుడు తెల్సింది.అందుకే ఆవకాయ మీద అంతంత పద్యాలు అలవోగ్గా అల్లేశావూ!

మానవి సహజ చాలా మంచి నవలలు.వాటి గురించి మనం మాట్లాడుకోవాలి.ఇక్కడ కాదులే!

నిన్ననే నాకు బహుమతిగా వచ్చిన బుక్ Rule the world, the way I did" అని చాణక్య గురిచిన పుస్తకమే ప్రస్తుతం చదువుతున్నా!

వేణు said...

మీ పుస్తకాల విశేషాలు బాగున్నాయి. ‘తులసిదళం’ చదివారు సరే, ఏమనిపించిందో రాయలేదేమిటి? దాని గురించి రంగనాయకమ్మ గారి విమర్శ పుస్తకంగా వచ్చింది. అది చదివారా?

‘లలిత సుగుణజాల తెలుగుబాల’ పద్యాలు నాకిష్టం. వీటిని రాసింది ‘కరుణశ్రీ’ జంధ్యాల పాపయ్యశాస్త్రి గారు. భాస్కర శతకం వేరు. ఆ శతకంలో ప్రతి పద్యం చివరా మకుటం ‘భాస్కరా!’ అని వస్తుంది!

S said...

బాగుంది.

రాజ్ కుమార్ said...

వామ్మో.. ఇన్ని పుస్తకాలు చదివేశారా?? ఈ సారి ఏ పుస్తకం కొనుక్కోవాలీ అన్న ప్రశ్న వస్తే ఈ టపా ఒకసారి చదివితే చాలన్న మాట.;) ;)
హేమిటో.. ఈ మధ్య అస్సలు కుదరటం లేదు చదవడానికి..;( ;(

నైస్ పోస్ట్ అండీ..

మనసు పలికే said...

అమ్మో...... ఇన్ని పుస్తకాలా.???????? నాకు కల్లు తిరుగుతున్నాయి సౌమ్య గారు..

కోటిలో విశాలాంధ్ర వారి ఎగ్జిబిషన్ లో కొన్నారా.? నేను కూడా అక్కడే కొంటాగా..;) కాకపోతే మీతో పోల్చుకోలేనులే. అప్పుడప్పుడు ఒకటి రెండు కొంటూ ఉంటాను అంతే. నేను చదవాల్సిన పుస్తకాల లిస్ట్ చాలా పెద్దదే ఉంది బాబోయ్. మొదలెట్టాలి నేను కూడా:)

సూ...పర్ టపా:)

SHANKAR.S said...

మధురాంతకం గారి కధలు చదివారా? అలాగే అమరావతి కథలు, మా పసలపూడి కథలు, భానుమతి గారి "అత్తగారి కథలు",

"ఏడుతరాలు ఎవరినైనా సరే ఒక వూపు వూపేసి గింగిరాలు తిప్పి విసిరి కొట్టే నవల." నేను ఈ విషయం లో సుజాత గారితో ద్వివీభవిస్తున్నాను

శివరంజని said...

అమ్మో...... ఇన్ని పుస్తకాలా.???????? నేను పుస్తకాలు ఎక్కువగానే చదువుతా..పుస్తకాలా పిచ్చి నాకు ఉంది ....... కాని నువ్వు చెప్పిన లిస్టు లో చందమామ పుస్తకాలు, ముళ్ళపూడి రమణీయాలు, బారిస్టరు పార్వతీశం ...ఇవే చదివాను .

"కన్యాశుల్కం" పుస్తకం లైబ్రరీ లో ఉంది కాని ఇంకా మొదలు పెట్టలేదు అది ......ఒక మాట చెప్పనా ఆ "కన్యాశుల్కం" పుస్తకం లో పదాలు పలకడానికి అర్ధం చేసుకోవడానికి కొంచెం కష్టం గాను .ఉంది అందుకే అది చదవకుండా పక్కన పెట్టేసా ..

ఆ.సౌమ్య said...

సుజాత గారూ
భలేవారే...మీరు ఇచ్చారని చెప్పకుండా ఉంటానా, పాపం చుట్టుకోదూ! :)
మీ పుస్తకాల పిచ్చి నాకు తెలుసులెండి. చేతికి రాగానే చదివేవరకూ నిద్రపోరు. నేనూ మీలాగే బాధపడుతుంటానండీ ఆ మహామహులందరూ నేను పుట్టకముందే కాలంచేసారని. భరాగో గారిని ఒకసారి కలిసాను, కానీ అప్పటికి ఆయన పుస్తకాలేవీ చదవలేదు. మళ్ళీ కలుద్దామనుకుంటుండగానే ఆయన కాలం చేసారు. ఎంతబాధపడ్దానో, అలాగే రమణ గారు కూడా. మనసు చివుక్కుమనిపిస్తుంది తలుచుకుంటే.

"ఏడుతరాలు ఎవరినైనా సరే ఒక వూపు వూపేసి గింగిరాలు తిప్పి విసిరి కొట్టే నవల."....100% కరక్ట్, నేను పూర్తిగా ఏకీభవిస్తున్నాను. కనీసం ఇప్పటికి ఓ పదిసార్లయినా చదివుంటాను ఆ పుస్తకాన్ని.

పద్యాల్లో నీ ఘనాపాఠిత్వం...హిహిహి ఏదో మీ అభిమానం. :P

మానవి, సహజ గురించి మనం మాట్లాడుకుందాంలెండి. :)

ఆ.సౌమ్య said...

@వేణు గారూ
ధన్యవాదములు.
తులసీదళం అప్పుడు చదువుతున్నంతసేపు బానే అనిపించింది, చిన్నతనం కదా. కానీ రెండోసారి డిగ్రీలో ఉండగా చదివాను, అప్పుడు మాత్రం పరమ చిరాకేసింది. RN విమర్శ చదివాను. ముందుమాట రాసినాయన మీద విరుచుకుపడ్డారుగా...నాకు ఆ మొత్తం విమర్శ అంతా భలే నచ్చింది.

"లలిత సుగుణజాల తెలుగుబాల" పద్యాలు కరుణశ్రీ గారు రాసారు కదూ...కరక్టే, సరి చేసానండీ. thanks a lot. అదే భాస్కర శతకం కూడా అదే టైములో చదివాను, అందుకే కొంత గందరగోళానికి లోను అయ్యాను. సరి చేసినందుకు ధన్యవాదములు.

ఆ.సౌమ్య said...

@S (sowmya V.B.)
Thanks! :)

ఆ.సౌమ్య said...

@వేణూరాం
Thanks....ఇంకా ఏమైనా లిస్ట్ కావాలంటే నన్ను అడుగు, చెబుతా. :)
టైముదేముంది...దానంతట అది పరిగెడుతూ ఉంతుంది...మనమే ఎలాగో టైము చేసుకు చదువుకోవాలి..మొదలెట్టు.

ఆ.సౌమ్య said...

@ మనసు పలికే
ధన్యవాదములు.
అవునా, నువ్వూ అక్కడే కొంటావా...బావుంది. :)
చదువు చదువు....మొదలెట్టు మరి.

@శివరంజని
ధన్యవాదములు
ఓహ్ నీకూ ఉందా పిచ్చి, బలే!

కన్యాశుల్కం కష్టంగా ఉందా? నాకలా అనైపించలేదే! చాల సరళమైన భాషలో ఉంటుంది. నీకు పదాలు కొన్ని కొన్ని అర్థం కాలేదేమో! ఏమైనా సందేహాలు ఉంటే నన్ను అడుగు, తప్పకుండా చెబుతాను. కానీ చదువు, పక్కన పెట్టేయకు. చాలా మంచి పుస్తకం. :)

ఆ.సౌమ్య said...

@ SHANKAR గారూ
ధన్యవాదములు. మీరలా కొత్త లిస్ట్ చెబుతుంటే నాకు బెంగగా ఉందండీ, ఎప్పుడు చదువుతానో ఏమో అవన్నీ! :(

భానుమతి గారి "అత్తగారి కథలు" చదివాను అని రాసాను కదండీ టపాలో...మీరు మిస్ అయినట్టున్నారు. :) మధురాంతకం కథలు, పసలపూడి కథలు చదవలేదు ఇంకా. అమరావతి కథలు చదివాను చిన్నప్పుడే...అంటే మొత్తం లిస్ట్ రాయలేను కదా. కొన్నే ఇచ్చానన్నమాట. :)

బులుసు సుబ్రహ్మణ్యం said...

మీ పుస్తకాల గోల బాగుందండీ. ఏడుతరాలు roots కి అనువాదమా. నాకు తెలియదు. దొరికితే చదవాలి. Roots చదివాను.
మల్లాది , మధురాంతకం గొప్ప కధకుడు, చదివారా. శరత్ సాహిత్యం గురించి వ్రాసినట్టు లేదు. చదవాలనుకుంటే తెలుగులో ఇదివరకు మంచి సాహిత్యమే ఉండేది. ఎంత గొప్ప రచయితలు. ఏమిటో ఏమైపోయారో వీళ్ళందరూ. వారసులు ఎవరూ కనిపించటం లేదు.

విష్ యు గుడ్ reading.

తృష్ణ said...

బావుంది టపా.
మొదట్లో నేనూ ఈ పుస్తకాల ఆసక్తి గురించి ఒక టపా రాసానండి. మా ఇంట్లో కృష్ణశాస్త్రి, చలం, శరత్ ముగ్గురివీ చాలా పుస్తకాలు ఉండేవి, ఇంకా శ్రీరమణ,బాపు-రమణల పుస్తకాలూ, తెలుగు భాష, సంస్కృతికి సంబంధించినవి, సినిమాలకు సంబంధించినవి ఎక్కువగా ఉండేవి, కొన్ని కవితా పుస్తకాలు, ఆంగ్ల పుస్తకాలు...అలాగ "ఇవీ" అని కాక వెరైటీ ఉండేది.ఇంకా కొన్ని సినిమా నవలలు ఉండేవి. భాష చదవటం వచ్చినప్పటి నూంఛీ నాకు దొరికిన పుస్తకం దొరికినట్లు చదవటమే పనిగా ఉండేది. అవన్ని బోలెడు సార్లు చదివేసేదాన్ని. అమ్మ కొన్ని సెన్సార్ చేసేది..:)
తర్వాత కలేజీకొచ్చకా పిన్ని,పెద్దమ్మల ఇళ్ళకి వెళ్ళినప్పుడు కోడూరి కౌసల్య, యద్దనపూడి,యండమురి,మల్లాది మొదలైన వాళ్ళ రచనలు వాళ్ళిళ్ళలోనే చదివాను.
నేను కొనుక్కోవటం వచ్చాకా చాలా కొన్నాను కానీ కొన్నవాటిల్లో కొన్ని చదవనేలేదు...:( సంసారంలో పడ్డాకా అభిరుచులన్నీ మూలపడిపోయాయి. ఇదిగో ఇప్పుడిప్పుడే
బ్లాగ్ పుణ్యమా అని అవన్నీ దుమ్ము దులిపి మళ్ళీ చదువుతున్నాను...:))))

మీరు వీలయినన్ని ఎక్కువ పుస్తకాలు చదవగలగాలని కోరుకుంటున్నాను.:)))

మురళి said...

వోల్గా నవల 'స్వేచ్చ' చదివారా? గోపీచంద్ 'అసమర్ధుని జీవయాత్ర,' గొల్లపూడి మారుతీరావు 'సాయంకాలమైంది' తిరుమల రామచంద్ర ఆత్మకథ 'హంపీ నుంచి హరప్పా దాక' చంద్రలత నవలలు 'రేగడి విత్తులు' 'దృశ్యాదృశ్యం' కెఎన్వై పతంజలి పుస్తకిఆలు (దొరికినవి దొరికినట్టు), స.వెం. రమేష్ ప్రళయ కావేరి కథలు, సోమరాజు సుశీల ఇల్లేరమ్మ కథలు, పాలగుమ్మి పద్మరాజు కథలు, నవలలు, అడివి బాపిరాజు నారాయణరావు, కోనంగి, హిమబిందు, గోనగన్నారెడ్డి, తిలక్ కథలు, బుచ్చిబాబు కథలు......................

మురళి said...

పిలకా గణపతి శాస్త్రి 'విశాల నేత్రాలు,' పైన మన మిత్రులు చెప్పిన మధురాంతకం రాజారాం కథలు, కేశవరెడ్డి నవలలు, డాక్టర్ పి శ్రీదేవి 'కాలాతీత వ్యక్తులు,' ఇప్పటి వాళ్ళలో సి. సుజాత కథలూ, నవలలూ (తాజా నవల 'రాతిపూలు')... అన్నట్టు 'కన్యాశుల్కం' చదివి కాళ్ళకూరి వారి 'వరవిక్రయం' చదవకపోతే ఎలా? శ్రీపాద 'అనుభవాలూ..జ్ఞాపకాలూను..' మంచి పుస్తకం. యండమూరి నవలల్లో నా రికమండేషన్ 'ఆనందో బ్రహ్మ' 'ప్రేమ' 'వెన్నెల్లో ఆడపిల్ల' మరియు 'లేడిస్ హాస్టల్.' మల్లాది 'అందమైన జీవితం' ఆహ్లాదంగా ఉంటుంది. చినవీరభద్రుడి కథలతో పాటు, వాడ్రేవు వీరలకష్మీ దేవి రచనలు కూడా బాగుంటాయి. కా.రా. కథలతో ఈ మధ్యనే ఓ పెద్ద సంకలనం వచ్చింది.. దాదాపు అన్ని కథలూ ఉన్నాయందులో.. నా పై కామెంట్ నుంచి అసమర్దుడినీ, తిలక్ నీ ఉపసంహరించుకుంటున్నా..

స్నిగ్ధ said...

వామ్మో సౌమ్య గారు ఇన్ని పుస్తకాలా...నాకూ పుస్తకాల పిచ్చి ఉంది కానీ మీ ఈ టపా,మిగతా బ్లాగ్ మితృలు రాసిన పుస్తకాల పట్టిక చూస్తే నేను ఇంకా ఎ,బి,సి,డి స్టేజీల్లోనే ఉన్నాన్నమాట...
హ్మ్మ్మ్...సుజాత గారి బ్లాగ్లో రూట్స్ గురించిన పోస్ట్ చదివినట్లు గుర్తు...కాలాతీత వ్యక్తులు కూడా చదివినట్లు గుర్తు..ఎప్పుడు చదివాను అన్నది గుర్తు రావడంలేదు...ఈ సారి లైబ్రరీకెళ్తే బుచ్చిబాబు గారి 'చివరకి మిగిలేది ' తెచ్చుకుంటాను...
ఓ పేద్ద లిస్ట్ ఇచ్చి నాకు బోలెడంత పని పెట్టారండీ...థాంకూ సౌమ్యగారు ...

భాను said...

బాగుంది. మీలాగే నేను గత సం.గా కొనడం, వీలున్నప్పుడల్లా కాదు..కాదు వీలుచేసుకొని కొన్ని చదవడం. హైదరాబాద్ , వరంగల్ వెళ్ళినప్పుడల్లా ఓ అయిదారు పుస్తకాలు కొండం అలవాటు అయిపొయింది. అవన్నీ ఎప్పుడు చదవాలో! ఇప్పుడే ఓ మూడు పుస్తకాలు తెచ్చా కోమలి గాంధారం(మృణాలిని), దాశరథి వి రెండు పుస్తకాలు ఒకటి శ్రీ శంకర చరితామృతం , రెండవది శ్రీ రామానుజ చరితామృతం. మీరన్నట్టు టైముదేముంది...దానంతట అది పరిగెడుతూ ఉంతుంది...మనమే ఎలాగో టైము చేసుకు చదువుకోవాలి.

భాను said...

మురళి గారూ మీ లిస్టు లో పుస్తకాలు చూసి అమ్మో ఇంకా మనం చూడనివి చాలా ఉన్నాయే అనిపించింది.

సౌమ్య గారూ వోల్గా లిస్ట్లో " స్వేచ్చ" , తోలి వెలుగులు కూడా వేసుకోండి.ఇంకా కాత్యాయిని రాసిన చేగువేరా చదవండి.

మాలా కుమార్ said...

చాలా పుస్తకాలు చదివారే . చాలా ఓపికన్న మాట మీకు .
నేనూ కోఠీ విశాలాంద్రలోనే ఎక్కువగా కొంటుంటాను .

Afsar said...

"మార్గదర్శి" చదివాను...అంటే వొక మాట గుర్తొచ్చింది. ఆ కథని (లేదా నవలికని) ఇప్పటి మార్కెట్ ఎకానమీ నేపథ్యంలో మళ్ళీ వొక సారి చూడండి. తెలుగు దేశపు ఆర్థిక రాజకీయాలని ఇంత బాగా మాట్లాడిన మరో కథ వుందా అనిపిస్తుంది.

మీ పుస్తకాల గోల బాగుంది, నా సొంత గోలని కూడా కాస్త విన్పించింది. వొక్కటే తేడా యేమిటంటే, నేను స్కూలుకి వచ్చే సరికి చందమామ వన్నె తగ్గింది. అప్పుడప్పుడే స్నేహ బాల, బాల జ్యోతి వలలో పడడం మొదలయ్యింది మాకు!

కొత్తావకాయ said...

హహ్హాహ్హా.. శతకాల పోటీ గురించి చెప్తావా? లేక నేను కామెంటులో గుర్తు చేద్దామా అనుకొనే లోపు చెప్పేసావ్. ఆ రోజులే వేరులే. అన్నట్టు సెకండ్ ఎవరికి వచ్చిందే. సావిత్రి కి కదూ!

మంచి పోస్టు. నువ్విన్ని చదివేసావని నీ మీద భయం పెంచుతుంది జనాల్లో. మంచి లిస్ట్ ఇచ్చావ్. నేను చదవనివి ఏరుకొని చదివేస్తా ఉండు.

నీకింకొక విషయం గుర్తుందా! నా కవితల పుస్తకం చూసి మీ నాన్నగారు ఓ పుస్తకం, ఓ చిన్న ఉత్తరం రాసి పంపించారు. "భావ కవిత్వం కవనానికి తొలి మెట్టు. ఇంకా చదువు. అప్పుడు ఇంకా బాగా రాయగలవు. అభినందనలతో ఆ.రామకృష్ణ " అని. అప్పుడే అనుకున్నాను. "ఇది అదృష్టవంతురాలు." అని. చదివే రుచి, చదవాలనిపించే వాతావరణం, చదివే అవకాశం ఉండడం ఎంత గొప్ప అదృష్టాలో చదివినవి గుర్తుండే ధారణ మరీ గొప్ప అదృష్టం. నేనూ బోలెడు చదివాను. మళ్ళీ చదివే దాక గుర్తొచ్చి చావవు.

పుట్టిన రోజులకి, పెళ్ళి రోజులకి, "కడుపుతో ఉన్న నేస్తాలకి" కూడా పుస్తకాలే బహుమతి ఇస్తుంటానని కూడా రాసేయాల్సింది. హ్హాహ్హా. మీ అమ్మ కడుపు చల్లగా ఇంకా ఇంకా పఠనాస(శ)క్తి ప్రాప్తిరస్తు.

, said...

I felt happy reading your article.
I suggest you to read some of the books especially 'WHITE NIGHTS' and 'POOR PEOPLE' of FYODOR DOSTOYEVSKY.

Rajendra Devarapalli said...

ఇదన్యాయం! నేను రాసిన ఒక్క పుస్తకం కూడా చదవలేదు మీరు????
ఇకటానికేటొచ్చె గానీ,మీరు మపాసా,హెమ్మింగ్వే,మాం ఈ ముగ్గురి జోలికెళ్ళకండి వెళ్లారో నా గతే పదుతుంది మీకు :)

ఆ.సౌమ్య said...

@బులుసు గారూ
ధన్యవాదములు.
అవునండీ ఏడుతరాలు బ్రహ్మాండంగా ఉంటుంది....మనసు చెమ్మగిల్లుతుంది నిజంగా. తప్పకుండా చదవండి.
శరత్ సాహిత్యం ఇంకా చదవలేదండీ. మాల్లాది కృష్ణాతీరం చదివాను. మధురాంతకం కూడా మొదలెట్టాలి ఇంక.

@తృష్ణ గారూ
ధన్యవాదములు. ఓహ్ బలే...మీ ఇంట్లో కూడా పుస్తాకాలుండేవా, మీకూ ఉందా ఈ పిచ్చి...బావుంది, బావుంది. నాకు నేస్తాలు చాలామందే ఉన్నారన్నమాట ఇక్కడ. :)

కొన్నిసార్లు చదువనో, సంసారమనో ఈ పుస్తకాలను మూలపడేయక తప్పదేమో అనిపిస్తుంది. కానీ మళ్ళీ మొదలెట్టండి....దానంతటదే వేగం పుంజుకుంటుంది.

మీ కోరిక తీరాలని నేనూ కోరుకుంటున్నా :D

ఆ.సౌమ్య said...

@ మురళీ గారూ
బాబోయ్, మీరు నాకు బరువు పెంచేస్తున్నారు...ఎన్నెన్ని పుస్తకాలో...ఇంకా నేనెన్ని చదవాలో!
అసలు మీరు చదివినన్ని పుస్తకాలు నేనెప్పటికైనా చదవగలనా అనిపిస్తుంటుంది మీ బ్లాగు చూసినప్పుడల్లా!

మీలిచ్చిన లిస్ట్ చూసాక నేను చదివినవి మరికొన్ని గుర్తొచ్చాయి. అవి కూడా కలిపాను టపాలో. మంచి లిస్ట్ ఇచ్చారు, thanks a ton. అన్ని పుస్తకాల పేర్లూ నోట్ చేసి పెట్టుకున్నాను. ఈసారి కొనేయాలి అన్నీ. కా.రా కథల సంకలనం వచ్చిందా...అయితే కొనేయాల్సిందే. :)

@స్నిగ్ధ గారూ
ధన్యవాదములు. అబ్బే నేను చదివినదేముందండీ. పైన మితృలు ఇచ్చిన లిస్ట్ చూడండి...వాళ్ళెన్నెన్ని చదివేస్తున్నారో!. నాకు ఇంకా బోల్డు పని పెట్టారు కూడా. :) చివరకి మిగిలేది బావుంటుంది. అలాగే అసమర్థుని జీవయాత్ర కూడా దొరికితే చదవండి.

ఆ.సౌమ్య said...

@ భాను గారూ
మంచిదండీ....అలగే కొనుక్కుని చదువుతూ ఉండండి. నేను కూడా కొన్న పుస్తకాలన్నీ ఇంకా చదవలేదు. ఒక్కోటి బయటకి తీస్తున్నా. కొనిపెట్టుకుంటే ఎప్పటికైనా చదువుతామనేది నా సిద్ధాంతం. :)

కోమలి గాంధారం గురించి ఇప్పుడే మురళీ గారి బ్లాగులో చూసాను. చదవాలి అయితే. ఒల్గా స్వేచ్చ కూడా చదవాలండీ ఇంకా. Thanks a lot!


@ మాలా కుమార్ గారూ
ధన్యవాదములు. ఇష్టం ఉంటే ఓపిక దానంతట అదే వచ్చేస్తుందండీ. :) మీరు కూడా కోటీలోనే కొంటారా...బావుంది బావుంది.

ఆ.సౌమ్య said...

@ అఫ్సర్ గారూ
ధన్యవాదములు. అవునండీ, ఈ మధ్యనే మార్గదర్శి మళ్ళీ చదివాను. చదువుతున్నంతసేపు ఆంధ్రప్రదేశ్ ఆర్థిక రాజకీయ పరిస్థితులే మదిలో మెదిలాయి. ఆయన ఎప్పుడో ఓ 40-50 యేళ్ళ క్రితం చెప్పిన నిజాలు ఈనాటికీ మనకి వర్తించడం ఆశ్చర్యంగా అనిపించింది. అయితే అప్పటినుండీ మనం "ఎదగలేదా" అనే సందేహం కూడా వచ్చిందనుకోండి.

నా గోల లో మీ గోల కూడా వినిపించిందా...భలే! స్నేహబాల నాకు తెలీదుగానీ బాలమిత్ర అని ఉండేది మా చిన్నప్పుడు. కానీ అది చందమామ ముందు దిగదుడుపే. మా ఇంట్లో పాత చందమామలు, నేను పుట్టకముందివి బోల్డు ఉండేవి....అవన్నీ చదివేదాన్ని.

Ruth said...

మ్మ్... నాకు కుళ్ళు వస్తుంది మీ పుస్తకాల లిస్ట్ చూస్తుంటే. నేను తెలుగు సాహిత్యం చాలా తక్కువ చదివాను. చిన్నప్పుడే రష్యన్ అనువాదాలు, అలా విక్టోరియన్ నవలలూ పరిచయమై తెలుగు చదివే అవకాశం రాలేదు. ఐనా నాకంత టేస్ట్ కూడా లేదేమో.
ఒక్క విషయం, ఏడు తరాలు బుక్ అంతా ఫిక్షన్ అనీ అస్సలు నిజం గా ఆ కధ జరగలేదనీ, పైగా రచయిత చాలా పార్టు వేరే పుస్తకం నుంచి కాపీ కొట్టాడనీ తెలిసి, ఆ పుస్తకం మీద ఉన్న అభిప్రాయం తగ్గిపోయింది. roots అంత కాకపోయినా, Uncle Tom's cabin కూడా చాలా పాపులర్ బుక్. ఆ పుస్తకం Abe Lincoln ని చాలా ప్రభావితం చేసింది అంటారు. వీలైతే అది చదవండి.

ఆ.సౌమ్య said...

@ కొత్తావకాయ
నీకు గుర్తుందా పద్యపఠన పోటీ :)...మన దేవీ ప్రకాష్ టీచరుగారు పెట్టారు కదా. సెకండ్ సావిత్రికి కాదు, శ్రీలతకి అనుకుంటా. కానీ మూడవ బహుమతి నీకే...నువ్వు 25-26 చదివావు. నాకు గుర్తుంది.

నా మీద భయం పెంచడమేమిటే బాబు..నాకే భయం కలుగుతున్నది ఇక్కడ మితృలు ఇచ్చిన లిస్ట్ చూస్తుంటే. చూడు, అందరూ ఎన్నెన్ని ఎలా ఎలా చదివేస్తున్నారో!...నేను వెనకబడిపోతున్నా :(

అవునేవ్, నాకు బాగా గుర్తుంది...మా నాన్నగారు నీ కవితలు చదివి నీకు ఉత్తరం రాసారు...బలే గుర్తుందే నీకు! :) సాధారణంగా నేను చదివినవి అంత తొందరగా మరచిపోనే కానీ ఏం లాభం నీ అంత బాగా రాయలేనుగా! :D

బహుమతుల సంగతి భలే గుర్తు చేసావే...ఇప్పుడు అది కూడా కలిపా టపాలో. ఇంతకీ నేను నీకిచ్చిన పుస్తకం చదివావా లేదా?

ఆ.సౌమ్య said...

@ Sridhar గారూ
Thanks a lot.
ఇంగ్లీషు పుస్తకాలు ఎవరూ suggest చెయ్యలేదే అనుకున్నా...హమ్మయ్యా మీరు చెప్పారు. అలాగేనండీ, మీరు చెప్పిన పుస్తకాలు తప్పకుండా చదువుతాను. thanks!

@రాజేద్ర గారూ
కోప్పడకండి బాబూ..నేను చదవాల్సిన లిస్ట్ ఇంకా చేంతాడంత పొడవుంది. దానితో ఈ ప్రపంచాన్ని చుట్టేయొచ్చు తెలుసా. ఆ చాంతాడులో మీ పుస్తకాలూ ఉన్నాయి...త్వరలో చదువుతా. :)

మామ్ పుస్తకాలు చదవడానికి ప్రయత్నించానండీ...అంత ఇంగ్లీషు మనకి ఎక్కదు..కష్టం, అందుకే ఆపేసా...భాష కొంచం సరళంగా ఉన్నదయితే సులువుగా చదవొచ్చు. మనకొచ్చిన ఇంగ్లీషే అంతంతమాత్రం కదా. అలాగే టాల్‌స్ట్రాయ్ కథలు కూడా మొదలెట్టి ఆపేసా భాష మీద పట్టు లేక.

Anwartheartist said...
This comment has been removed by the author.
ఆ.సౌమ్య said...

@ ruth గారూ
ధన్యవాదములు.
అయ్యో బలేవారే టేస్ట్ లేదనకండి..ఓసారి చదివి చూడండి. తెలుగు పుస్తకాల రుచి మరిగితే ఇంక మీరు వదలనే వదలరు.
అయినా తెలుగనే కాదండీ ఏ పుస్తకం అయినా చదవడం మంచి అలవాటు. ఇంగ్లీషు భాష మీద నాకు పట్టు తక్కువ కాబట్టి నేను చదవట్లేదు లేదంటే వాటి దుమ్మూ దులుతాను. మంచి పుస్తకం ఏదైనా సరే చదవాలి..ఏ భాషైనా సరే. మీరు అలా చదువుతున్నారు కదా...అదే చాలు.

ఏడుతరాలు/roots ఫిక్షనా...నిజమా మీరు చెప్పేది? నమ్మలేకపోతున్నాను. ఏది ఏమైనా అది రాసిన విధానం మాత్రం ఆద్భుతం.

Uncle Tom's cabin పుస్తకం చదివేసానండీ ఇంతకుముందే...మంచి పుస్తకం అది కూడా.

ఆ.సౌమ్య said...

@ అన్వర్ గారూ
నిజం, మార్గదర్శి కథ లోతుపాతులు కొలవగలిగినవి కాదు. నాకు మాత్రం ముందు మార్గదర్శి తరువాతే వడ్లగింజలు. మీ శపధం బ్రహ్మాండం...వడ్లగింజల బొమ్మల కథ కోసం నేను వెయ్యి కళ్ళతో ఎదురుచూస్తుంటాను. రాచపీనుగ తోడు వస్తే చాలా గొప్ప కథ. ఆ మాటకొస్తే కలుపుమొక్కలో, గులాబీ అత్తరో, తాపీమేస్త్రీ రాందీక్షితులో...దేనికదే సాటి.

హరే కృష్ణ said...

motorcycle diaries ఇది కేక అసలు :)

ఇందు said...

మిమ్మల్ని చూస్తుంటే ముచ్చటేస్తోంది సౌమ్యా గారూ! ఎన్నెన్ని పుస్తకాలు చదివారూ?? ఈసారి ఢిల్లి వస్తే...మీ ఇంటిమీద దాడి చేసి మీ పుస్తకాలన్ని ఎత్తుకుపోతా!! ;)

మీరు చదివిన వాటిల్లో నేను చదివినవి....బారిష్టరు పార్వతీశం,ముళ్ళ్పూడి రమణీయం,ఫౌంటైన్ హెడ్ మాత్రమే! ఇవి కాక....మధురాంతకం రాజరాం కధలు, మల్లాది గారి హాస్య రచనలు,ఆధ్యత్మిక రచనలు,వంశి 'మా పసలపూడి కథలూ,'ఆకుపచ్చని గ్నాపకం', ఇక ఇంగ్లిష్లో చేతన్ భగత్ అన్ని పుస్తకాలు, కొన్ని సిడ్నిషెల్డన్ పుస్తకాలు, 'ది ఆల్కెమిస్ట్'...ఇంకా చిన్నచిన్న రచయితలు రాసిన బోలెడు పుస్తకాలు...ఇలా...ఏవో నా కెపాసిటికి తగ్గట్టు చదివా :)

ఎప్పటికైనా మీరు చదివిన పుస్తకల లిస్ట్ నేనూ కంప్లీట్ చేయాలని ఆశిస్తున్నా! :)

Arun Kumar said...

మీ పుస్తకాల విశేషాలు బాగున్నాయి.

ఆ.సౌమ్య said...

@ఇందు
ధన్యవాదములు. అమ్మా ఆ ఆ, నా పుస్తకలు ఎత్తుకుపోవడానికి ఒప్పుకోనుగానీ అప్పిస్తా కావాలంటే. మరీ అంతగా నచ్చితే కొనిపెడతా...అంతేగానీ అమ్మో నా పుస్తకాలు నాకు బంగారం తెలుసా! :)

మరింకేం, మీరు కూడా ఎక్కువగానే చదివారు. అలా చదువుతూ ఉంటే లిస్ట్ అదే పెరిగిపోతుందిలెండి. తప్పకుండా అన్నీ చదవండి.

@ హరే కృష్ణ
thank you

ఆ.సౌమ్య said...

@ Arun Kumar
ధన్యవాదములు. :)

కొత్త పాళీ said...

"పదవతరగతి సెలవుల్లో విరాటపర్వం మొత్తం బట్టీ పట్టాను"

Wow - double wow!!

ఆ.సౌమ్య said...

@ కొత్తపాళీ గారూ
ధన్యవాదములు...డబుల్ :)

vivek said...

Andariki gift isthunnaru sare,..nako gift istha annaru okapudu gurthunda??{RN gari "sweet home"}....adi ivvakundane delhi poyindru...:(....meeru naaku aa book baaki....marchipokandi...:D

bagundi me books gola,anni padyalu etla gurthunchukunnaro...great!!!...:D,...n me posts chaala peddha ga untunnay ee madya,ofcoz,adi avasrame anukondi....bt nalanti baddhakasthula gurinchi alochinchandi..:P...1st comment pettali anukoni,..last comment pedthunna...:D

ఆ.సౌమ్య said...

@వివేక్
నీ గిఫ్ట్ బాకీ ఉంది.... గుర్తుందిలే. హైదరాబాదులో ఉన్నంతకాలం కలిసావుకావు. కలిసుంటే అప్పుడే ఇచ్చేసేదాన్ని. ఇచ్చేస్తాలే ఏదో ఒకరోజు. :)

పెద్ద పోస్టా...ఇంకా బోల్డు రాయలనుకున్నా కానీ కుదించి రాసాను. నీ బద్దకాన్నీ కాస్త పక్కన పెట్టు చదువు బాబు.

Thanks!

Sujata M said...

Hi Sowmya

Will u be my friend ? (Liked this post very very much) :D

ఆ.సౌమ్య said...

@Sujatha
hahaha why not?
we are good friends from now.
:)

Thanks for the comment!

నేస్తం said...

అమ్మో చాలా పుస్తకాలు చదివారు పరిచయం చేసారు..నేను అన్నిటికీ ఒక ముహుర్తం పెట్టుకుంటూ ఉంటాను ఇండియా వెళ్ళగానే అని..ఇప్పుడూ అంతే ...ఇండియవెళ్ళగానే బోలెడు పుస్తకాలుపుస్త్కాలు కొనేసుకుని చదువుకోవాలి..

ఆ.సౌమ్య said...

@ నేస్తం
హహహ ఈసారి మాత్రం మీరు పెట్టుకున్న ముహూర్తానికి కొనేసుకోండి అన్ని పుస్తకాలు. :) Thanks!

lakshmana kumar malladi said...

హేమండోయి నేనుకూడా మీ లాగే పుస్తకాల పురుగుని, నా బ్లాగు ను మొదట్లో తయారుచేసినపుడు "పుస్తకాల పురుగు" అని వేరొకటి కూడా తయారుచేసి పెట్టాను కానీ ఇప్పటివరకు రాయటమే కుదరలేదు.

నా ఏడవ తరగతిలో ననుకుంటా మొదటగా మధుబాబు గారి అపరాధ పరిశోధన నవలలతో ఆరంభించాను. అప్పట్నుంచి, వెచ్చాల తో వచ్చే వారపత్రిక కాయితాలు కూడా ముందూ వెనుక కధలు తెలియక పోయినా లాగించేసేవాడిని. డిగ్రీ అయిన తరువాత దాదాపు సంవత్సరం పాటు నా ఉద్యోగం రోజూ బందరు జిల్లా గ్రంధాలయం లో పోద్దుత్నుంచీ సాయంత్రం దాకా చదువుదే చదువుడు, లెక్కే లేదు. ఆ ధ్యాస తోనే మీలాగా పుస్తకాలు కొండడం నేర్చుకున్నాను. అంట కాకపోయినా చిన్న సైజు లైబ్రరీ నే నేవూరు వెళ్ళినా నాతోనే తిప్పుతుంటాను.

చదివి వదిలేయటం నాకు నచ్చాడు. కొన్ని రోజులాగాక చదివినవే మళ్ళీ తీసి అనుభూతులు నాతొ నేనే పంచుకోవటం నాకు చాలా ఇష్టం. శ్రీ పాద, మధురాంతకం, చాసో, తిలక్, యండమూరి, వంశీ, భానుమతి, మునిమాణిక్యం లాంటి వారి కథలు నాకు బాగా ఇష్టం. శ్రీపాద అయితే చదివిన ప్రతీసారీ ఇంతబాగా తెలుగు లో చెప్పచ్చా, అని వింత వింత పదాలు, అచ్చ తెలుగు పదాలు కళ్ళు విప్పార్చి మరీ చదువుతాను.

రకరకాల కాలం లోని రకరకాల కథలు ఆనాటి సంస్కృతీ, సంప్రదాయాలని, సామాజిక కోణాల్ని మనకు పరిచయం చేస్తాయి. ఈ చదువుడు అలవాటు చాలా మంచిది అని మనకి మనమే అభినందించుకుంటూ...

మీలాగా ఈ విషయమై నేనూ ఒక టపా రాద్దామని అనుకుంటున్నాను.

లక్ష్మణ కుమార్ మల్లాది.

ఆ.సౌమ్య said...

లక్ష్మణ కుమార్ గారూ
ధన్యవాదములు.
మీరు కూడా పుస్తకాల పురుగా....బావుంది, బావుంది. అబ్బో మీరు ఏడోతరగతిలోనే మొదలెట్టరా...భలే!

పుస్తకాల పురుగు బ్లాగు మొదలెట్టండీ...మేము చదువుతాం. మీరు చదివిన పుస్తకాల గురించి రాయండి ఎంచక్కా.

శ్రీపాద వారి విషయంలో నాదీ అదే ఫీలింగ్...ఏం తెలుగు, ఏం భావం...ఎంత గొప్ప కథలో!

మీరు కూడా పుస్తకాల గురించి టపా తప్పకుండా రాయండి.

lakshmana kumar malladi said...

ఏదో ఇలా మీ కబుర్ల పై జాబు రాసినపుడు కాకుండా, నా జ్ఞాపకాల తేనెతుట్టె , నా బ్లాగు కూడా తరచూ చదూతూన్దచ్చు గదా. వీలయితే సభ్యురాలిగా కూడా చేరగలరు (నేను ఇప్పటికే మీ బ్లాగు అభిమానిని అని మీ సభ్యుల చిట్టా చూస్తె తెలుస్తుంది.)

ఆ.సౌమ్య said...

లక్ష్మణ కుమార్ గారూ
హిహిహి తప్పకుండా చదువుతానండీ :))

buddhamurali said...

ఆ సౌమ్య గారు ఈ రోజు ఉదయమే మీ బ్లాగ్లో మీపుస్తకాల గోల చదివాను . అందులో కొన్ని పుస్తకాలు నేను చదివినందుకు చదివినదుకు సంతోషించా, కొన్ని చదవనందుకు నాకు నేనే క్లాస్స్ తీసుకున్నాను . మీ ఉత్తరాన్ద్రకు చెందిన వారే పతంజలి పుస్తకాలు ఎమీ చదవలేదా ? ఆయనకు వ్యంగ్యం అధ్బుతంగా రాయడం వచ్చు కానీ తనను తాను మార్కెటింగ్ చేసుకోవడం అస్సలు రాదు . పతంజలి బుక్స్ చదవండి. అలానే ఓషో రజనీష్ తెలుగు అనువాదం జీవిత రహస్యాలు చదవండి ............

ఆ.సౌమ్య said...

@బుద్దా మురళి గారూ
నా బ్లాగు కి స్వాగతం. పతంజలి గురించి తెలుసుగానీ పుస్తకాలు ఇంకా చదవలేదండీ. ఉత్తరాంధ్ర వారిలో చాసోవి, రా.వి శాస్త్రి వి చదివాను కానీ పతంజలి వి ఇంకా చదవలేదు....కొనేసి చదివేస్తా వెంటనే

ఓషో పుస్తకాలు కూడా చూసాను కానీ చదవలేదు..ఈసారి ప్రయత్నిస్తాను.

Thank you!

naresh chowdary said...

chala abburam anipistundi mee vishya parignanam, mee alochanaa sarali entho unntamga undi

sudaabhinanddanalu

by the way motor cycle diaries ,nenu chadivanandy

che guevara anubhavaala saram ee pustakam manasuku hattukune bhavaaalu
rachana saili vantivi vundavu

kanee che tana desa prajala bhadalanu choosina drushti konam
goppaga vuntundi

sure it will provoke a bit of social conciousness .

subham

కమల్ said...

వోరి నాయనో ఇన్నేసి పుస్తకాలు చదివారా..? హ్మ్..కనీసం మీరు చదివిన పుస్తకాల లిస్ట్‌లొ నుండి నేను కనీసం ఓ ఐదు శాతం కూడ చదివుండను....ఆ మాత్రం దానికే..తల ఎగేరుసుకొని గొప్పలు పొతుంటాను. మీరే కాదు ఇక్కడ కామెంట్స్ రాసిన వాళ్లు కూడ అన్నేసి పుస్తకాలు చదివారంటే..! మీ ముందు నేను పిపిలీకాన్నే.

Unknown said...

మీ మినీ బయోగ్రఫీ బాగుంది sowmya garu.
ఆశ్చర్యం వేసింది వైవిధ్య రచనలు చదివినందుకు. భయం వేసింది మీలాంటి పాఠక రాక్షసులు ఇంకా ఎంతమంది ఇక్కడ వున్నారోనని. సిగ్గేసింది మీలా సమయపాలన లేనందుకు.