StatCounter code

Wednesday, December 15, 2010

ఆరెంజ్ నచ్చిందా? నచ్చలేదా?

......అంటే కొంత నచ్చింది, కొంత నచ్చలేదు. ఈ సినిమా గురించి చాలామంది చాలా రాసేసారు. కాబట్టి నేను కథ అదీ మళ్ళీ చర్చించదలచుకోలేదు. నాకు తట్టిన ఒకే ఒక్క విషయం గురించి చర్చించదలుచుకున్నాను.

ప్రేమలో నిజాయితీ ఉండాలి, నిజమైన ప్రేమలో అబద్దాలాడకూడదు అన్న పాయింట్ నాకు నచ్చింది. నిజమే ప్రేమలో నిజాయితీ అన్నది చాలా ముఖ్యం. కానీ అది ఎలాంటి ప్రేమ అవ్వాలి? ఈ విషయంలో దర్శకుడు భాస్కర్ కి ఉన్నన్ని అపోహలు ఇంకెవ్వరికీ ఉండవేమో! చూడగానే ప్రేమించేస్తే అది జీవితకాలం ఎలా నిలుస్తుంది? అలాంటి ప్రేమని నిలుపుకోవాలంటే అబద్దాలు ఆడక తప్పదు మరి. చరణ్ చేత చెప్పించినట్టు ప్రేమ అనేది రెండు బ్రైన్స్ కి సంబంధించిన విషయం. ఏ రెండూ మెదడులు ఒకేరకంగా ఆలోచించవు. ఎవరికి నచ్చినట్లు వాళ్ళు చేస్తూ ఉంటే ప్రేమ జీవితకాలం ఎలా నిలుస్తుంది? ఒకరిని ప్రేమించాలంటే వాళ్ళలో నచ్చిన విషయమేదో ఉండాలిగా. వాళ్ల గుణగణాలో, వ్యక్తిత్వమో లేదా మరోటో...ఏదో ఒకటి నచ్చాలిగా. ప్రతీ మనిషిలోను కొంత మంచి, కొంత చెడు ఉంటుంది. కొన్ని ఇష్టాయిష్టాలుంటాయి. కొంత సహజసిద్ధమైన స్వభావం ఉంటుంది. ఇవేమీ చూడకుండా మొదటి చూపులోనే వచ్చే ప్రేమ ఎలా నిలుస్తుంది? ప్రేమలో ఒకరి ఇష్టాయిష్టాలను చంపుకోనక్కర్లేదుగానీ చిన్న సర్దుబాట్లు కచ్చితంగా ఉంటాయి.

చరణ్ మొదట ప్రేమించిన అమ్మాయి ఎందుకు నచ్చిదో తనకే తెలీదు. వెతుక్కుంటూ ముంబై వెళ్ళాడు. ఆ అమ్మాయికి ఉన్న విపరీతమైన possessiveness ని తట్టుకోలేకపోయాడు. అబద్దాలు చెప్పాడు, అది తనకి నచ్చలేదు విడిపోయడు. రెండు బ్రైన్స్ ఒకటి కావు అని తెలిసిన అబ్బాయికి ప్రేమ చివరిదాకా బతకాలంటే అవతలి బ్రైన్ ఎలాంటిదో, అందులో ఏముందో తెలుసుకోవడం చాలా అవసరం అని ఎందుకు తెలీలేదో!

9 ప్రేమలన్నాడు, మనకి అవేమీ చూపించలేదూగానీ జానూ ని ప్రేమించినప్పుడు కూడా తనలో ఏమి చూసాడు తింగరితనం తప్ప. జీవితాంతం కలిసి బతకడానికి ఆ తింగరితనం మాత్రం కచ్చితంగా సరిపోదు. మరి ఏమీ చూడకుండా ప్రేమించిన ప్రేమ చివరి వరకూ ఎలా నిలాస్తుందిట? అలా నిలవదు అని ఆ అబ్బయి చెబుతూ ఉంటే అందులో తప్పేమిటిట? సముద్రమంత ప్రేమని చూడాలంటే ఆ మనిషిపై మనకి ఎంత అభిమానం ఉండాలి, ఎంత ప్రేమ ఉండాలి! అలా ఉండాలంటే ఆ వ్యక్తిలో మనల్ని కట్టిపడేసేది ఏదో ఒకటి ఉండాలి కదా. అలాంటి ప్రేమ తొలిచూపులో ఎలా రాగలదో నాకర్థం కావట్లేదు. చివరికి ఇంకొంచం ప్రేమిస్తానన్నాడు, అది కూడా ఎందుకు, ఏం చూసి? ఈ విషయంలో జానూ పాత్ర కొంతలో కొంత నయం. మొదట్లో ప్రేమించాలన్న ఆకాంక్ష తప్పితే ఆ పిల్లకి ఏమీ తెలీదు. రామ్ ని కలిసిన తరువాత తనకేం కావాలో మెల్లమెల్లగా తెలుసుకుంది. రాను రానూ ఆ పాత్రకి ఒక రకమైన మెచ్యూరిటీని తీసుకొచ్చారు. జానూకి తనకేం కావాలో తెలుసు. నిజంగా జీవితాంతం ప్రేమించే వ్యక్తి కావాలి అనుకుంది. అది సరి అయిన కోరికా కాదా అన్నది వేరే విషయం. కనీసం ఏదో ఒక క్లారిటీ ఉంది కదా ఆ అమ్మాయికి. ఇతగాడికీ అదీ లేదు, ఎవరిని ఎందుకు ప్రేమిస్తున్నాడో తనకి తెలీదు. మరి అలాంటి ప్రేమ కొంతకాలంకన్నా నిలవదు అని చెప్పే తన ఫిలాసఫీ కరక్టే కదా. అందులో తప్పేముంది? దానికంత చర్చ ఎందుకు? అంత సినిమా తీయడమెందుకు?

అయినా ఇది భాస్కర్ కి మొదటిసారి కాదు. "పరుగు" సినిమాలో కూడా అంతే. కళ్ళల్లో కళ్ళు పెట్టి చూస్తే ప్రేమ పుట్టేస్తుందిట. తండ్రీకూతుళ్ళ బంధం గురించి గొప్పగా చెబుతూ యువతీయువకుల ప్రేమ విషయంలో మాత్రం పప్పులో కాలేసాడు. ఆ సినిమాలో మిగతా విషయాలన్నీ బాగుంటాయిగానీ ఈ కళ్ళల్లో కళ్ళు పెట్టి చూడగానే వచ్చేసే ప్రేమే మింగుడుపడదు. ఇప్పుడు ఆరెజ్ సినిమాలోనూ అదే చూపించాడు. మరీ కళ్ళల్లో కళ్ళు పెట్టి చూడడం లేదుగానీ తొలిచూపు ప్రేమ మాత్రం బలంగా చూపించాడు. పైగా ఆ ప్రేమ మీద పెద్ద పెద్ద చర్చలు, వాగ్యుద్ధాలు. అవసరమా అనిపించింది. బొమ్మరిల్లు సినిమాలో ప్రేమకి కావలసినదేమిటి అన్నది ఎంతో బాగా చూపించాడు. హాసినిని హీరో ఎందుక్లు ఇష్టపడుతున్నాడనే విషయాన్ని కనీసం 1-2 సార్లయినా చెప్పించాడు సినిమాలో. హీరో తనకి నచ్చినట్టు జీవితం గడపలేకపోతున్నాడు. కాబట్టి అలా స్వతంత్ర్యంగా తనకి నచ్చినట్టు గడిపే ఒక అమ్మయిని చూసి చాలా ఇష్టపడతాడు. "నీకు ఏది నచ్చితే అది చేస్తావు, నీకు కావలసినట్టు బతుకుతావు అదే నీలో నాకు నచ్చింది" అని హీరో చేత చెప్పిస్తాడు. అది బావుంది. మరి అదే పద్ధతి మిగతా సినిమాలలో ఎందుకు పనికిరాలేదో!

ప్రేమ అంటే అభిరుచులు, ఇష్టాయిష్టాలు ఒకటవడం మాత్రమే కాదు అవి కలవకపోయినా పెద్దగా వచ్చే నష్టం లేదు ( మరీ ఉత్తరదక్షిణ ధృవాల్లా ఉంటే చెప్పలేంగానీ)... కానీ భావాలు కలవడం, వ్యక్తిత్వం నచ్చడం అనేది చాలా ముఖ్యం. ప్రేమంటే ఒకరి ఇష్టాన్ని ఇంకొకరు గౌరవించుకోగలగడం, ఒకరి తప్పుని ఇంకొకరు మన్నించగలగడం, ఒకరి సుఖదుఃఖాలను ఇంకొకరు పంచుకోగలగడం. ఒక సీనులో "నాకు క్రికెట్ అంటే ఇష్టం, నీకు గోల్ఫ్ అంటే ఇష్టం. నాకు గ్రఫిటీ అంటే ఇష్టం, నీకు ఇష్టం లేదు. ఇవాళ నాకు నచ్చింది, రేపు నచ్చకపోవచ్చు. జీవితం మొత్తం ప్రేమ ఒకలాగే ఉండదు" ఇందులో చివరి చెప్పిన వాక్యాలు కరక్టే కానీ వాటిని అన్వయించిన విషయాలే కరక్టు కాదు.

"ఇవాళ నచ్చినది రేపు నచ్చకపోవచ్చు"...నిజమే, కానీ అది ఏ గోల్ఫ్ ఆటకో, గ్రఫిటీకో సంబంధించిన ఇష్టమయితే నచ్చకపోయినా ఫరవాలేదు, దానికోసం విడిపోనక్కర్లేదు. అలా చిన్న చిన్న విషయాలకోసం విడిపోయేవాళ్ళు అసలు ప్రేమించకుండా ఉంటేనే మంచిది. కానీ జీవితంలో పెద్దవి అనుకునే విషయాల్లో, ఇప్పుడు నచ్చి తరువాత నచ్చకపోతే దానికి ఏదో ఒక సరి అయిన కారణం ఉండే ఉంటుంది. అలా కాకుండా నాఇష్టం నాకు నచ్చలేదంతే అని అంటే హాయిగా విడిపోవచ్చు, అలాంటి మూర్ఖులతో ఉండక్కర్లేదు. కాబటి ఇవాళ నచ్చింది, రేపు నచ్చకపోవడం అనేది అభిరుచులకి మాత్రమే సంబంధించిన అంశంగా చూపించి, విడిపోవడానికి అదొక కారణంగా చూపించి వాదించడం హాస్యాస్పదంగా ఉంది.

"జీవితం మొత్తం ప్రేమ ఒకలాగే ఉండదు"...ఇదీ నిజమే. ప్రేమతో పాటు బాధ్యతలు వస్తాయి. వాటిని నిర్వర్తించే క్రమములో ప్రేమ తగ్గినట్టుగానో, పెరిగినట్టుగానో అనిపించొచ్చు. అసలు ఏ వ్యక్తి ఇంకొక వ్యక్తి గురించి ఒక్కరోజులోనూ, ఒక్క సంవత్సరంలోనో తెలుసుకోలేడు. ఇద్దరు వ్యక్తులు కలిసి జీవిస్తున్న కాలంలో ఒక్కోరొజూ ఒక్కో కొత్త అనుభూతి వస్తుంటుంది. కొత్త విషయం తెలుస్తుంటుంది. ఆ అనుభూతులు చాలామాటుకు జీవితంలో ఎదురయ్యే సంఘటనలపై ఆధారపడి ఉంటాయి. వ్యక్తులు ఎదుగుతూ ఉంటారు, కొత్తకొత్త విషయాలు తెలుసుకుంటూ ఉంటారు. ఆ క్రమంలో ఒకరినొకరు ఇంకా ఎక్కువగా తెలుసుకుంటూ ఉంటారు. ఇది నిరంతర ప్రక్రియేగానీ ఒక్కరోజులో జరిగేది కాదు. అలా వ్యక్తులు మారుతున్నప్పుడు ప్రేమ తగ్గడమో, పెరగడమో జరుగుతూ ఉంటుంది. అంత మాత్రనా విడిపోవడమే పరిష్కారం కాదు, మరీ భరించలేనంతాగా మారిపోతే తప్ప.

మొత్తం ఇలాంటి కంఫ్యూజన్ తోనే సినిమా నడిచింది. సినిమా చివరివరకూ చూసిన తరువాత ఇందులో చెప్పిన విషయమేమిటో నాకు బోధపడలేదు. ప్రేమలో నిజాయితీ ఉండాలి అన్నదే పాయింటయితే తొలిచూపు ప్రేమల్లో "కొంతకాలం ప్రేమ", "జీవితం చివరి వరకూ ప్రేమ" అన్న వాదనేమిటి విడ్డూరంగా! పోనీ చివరికి దర్శకుడు ఏ విషయాన్ని బలపరిచాడో కూడా అర్థం కాలేదు.

అందరిలాగే కాన్సెప్టు గురించి పెద్దగా ఆలోచించకుండా ఏదో మూసలో సినిమాలు తీస్తే ఈ తొలిచూపు ప్రేమలని చూడొచ్చు. తాతల కాలము నుండి భరిస్తున్నాం కదా ఇంకో సినిమాకి కూడా సర్దుకుపోతాం. కానీ ఏదో ఒక ముఖ్యమైన విషయం గురించి చర్చిస్తూ, conceptual movie తీద్దామనుకున్నప్పుడు మాత్రం ఈ తొలిచూపు ప్రేమని చూపించడం, దానిలో వాదనలు, చర్చలు....చాలా అనవసరం.

ఇంక మిగతా విషయాలకొస్తే ప్రపంచంలో ఎవరి ప్రేమలోనూ నిజాయితీ లేదని చూపడం మాత్రం నాకు అస్సలు నచ్చలేదు. జానూ తల్లిదండ్రుల మధ్య ప్రేమ గురించి చూపించినప్పుడు కూడా...వాళ్ళిద్దరూ పెద్దవాళ్ళయిపోయారు. జీవితంలో బాధ్యలు, బరువులు పెరిగాయి. అలాంటి సమయంలో ఒకరి మీద ఒకరు ప్రేమని వ్యక్తపరుచుకునే సందర్భాలు ఎక్కువగా రావు. అంతమాత్రాన గుండెల్లో ప్రేమ లేదని కాదు.

అలాగే బోలెడంతమంది ప్రేమజంటలని చూపించారు సినిమాలో. కానీ అన్ని జంటల్లోనూ మగవాళ్లదే తప్పు, మగవాళ్ల ప్రేమలోనే అబద్దాలుంటాయి అని చూపించడం ఏమీ బాలేదు. సినిమాలో రామ్ చెప్పిన విషయాన్ని గ్రహించిన అన్ని జంటల్లోనూ అబ్బయిలదే నిజాయితీలేని ప్రేమ అన్నట్టు ఆ అమ్మాయిలందరూ అబ్బాయిలని వదిలేసి వెళ్ళిపోతారు.

ఇక నాగబాబు చేత చివర్లో చెప్పించిన మాటలు బావున్నాయికానీ అసలు ఆ పాత్ర ఎందుకు, ఆ పాత్ర ఉద్దేశమేమిటో అస్సలు బోధపడలేదు. నాగబాబు భార్య ఎప్పుడూ ఆయనగారి నెత్తిమీద పూలకుండీలు విసిరేస్తూ ఉంటుంది. సినిమా మొత్తం వాళ్ళిద్దరూ భయంకరంగా తగవులాడుకుంటున్నట్టే చూపించారు. మరి అప్పుడు కూడా సముద్రమంత ప్రేమని పొందడానికి ఒక్కరినే ప్రేమించాలా, ఒక్కరితోనే ఉండాలా? హేవిటో!

చాలా ఒళ్ళు మండిన విషయం ఆ truth or dare ఆట. ఒకమ్మాయి నీ దగ్గరకొచ్చి లవ్ or సెక్స్ అని అడిగితే....లవ్ అని సమాధానమిస్తాడు ఆ అబ్బాయి. అది తప్పంటాడు హీరో. అదెలా తప్పవుతుందో నాకర్థం కాలేదు. అది ఒక hypotheticle question, దీనికి సమాధానం చెప్పినప్పుడు ముందు 30 యేళ్ళు ఏమి జరిగింది, వెనుక 30 యేళ్ళు ఏమి జరిగింది అని ఆలోచించి చెబుతారా ఎవరినా బుద్ధి లేకుండా. ఇంక ఆ చీటీల బేఛ్ ముగ్గురూ జానూ ని మిగతావారికోసం త్యాగం చేస్తామంటారు. అంతమాత్రాన జానూని ముగ్గురూ వదిలేసినట్టెలా అవుతుంది, తిక్క ప్రశ్నలు కాకపోతే. మిగతా ప్రశ్నలలో కొన్ని బాగానే ఉన్నాయి, కొన్ని అస్థవ్యస్థంగా ఉన్నాయి.

ఇంక, బాగా నచ్చిన సీను.....రామ్ తనని ఎన్నిసార్లు కాపాడాడు, ఎన్నిసార్లు తనకి సరైన సమయంలో సరైన నిర్ణయం తీసుకునేలా చేసాడు అని జానూ చెప్పే సీను. అలాగే రామ్ "నేను ఏదీ నిన్ను కాపాడాలని చెయ్యలేదు,నా ప్రేమలో నిజాయితీ చూపించాను." అని చెప్పే సీను.

జెనీలియాని అస్సలు భరించలేకపోయాను. ఏదో బొమ్మరిల్లు హాసిని ఊహించుకుని వెళితే ఇకేదో కనిపించింది. చరణ్ నటనలో కొంత మెచ్యూరిటీ కనిపించింది. మనిషి కూడా కాస్త బావున్నాడు ముందర సినిమాలతో పోలిస్తే. పాటలు కొన్ని బావున్నాయి, సందర్భోచితంగా ఉన్నాయి.

మొత్తానికి ఒక అర్థం లేని విషయం కోసం ఒక అనవసర చర్చ అనిపించింది సినిమా చూసాక. ఏ విషయాన్ని ప్రధానంగా చూపించాలనుకున్నాడో ఆ విషయం గురించి సరైన పద్ధతిలో చర్చించకపోవడంతో సినిమా తేలిపోయింది.

అయితే ఒక్కటి.....

సినిమా చూస్తున్నంతసేపూ ఎక్కడో ఓకచోట ప్రతీ ఒక్కరికీ "నా ప్రేమలో ఎంత నిజాయితీ ఉంది" అన్న ప్రశ్న రావడం, తమని తాము బేరీజు వేసుకోవడం కచ్చితంగా జరుగుతుంది. ఒకవేళ అదే సినిమా లక్ష్యమయితే అది నెరవేరినట్టే!
---------------------------------

ఇదే వ్యాసం నవతరంగం లో కూడా ప్రచురితమయింది.


56 comments:

C.ఉమాదేవి said...

సినిమా చూడలేదుకాని సిద్ధాంతవ్యాసమనదగ్గ మీ విశ్లేషణ చదివాక సినిమా కళ్లకు కట్టినట్టయింది.ప్రేమ నిత్యహరితం.వసివాడనిది,పస వీడనిది.ఇలాంటి ప్రేమను ఎప్పటికప్పుడు కొత్తకోణం అంటూ చూపెట్టే ప్రయత్నం మన దర్శకులది.అయతే బంతెపుడూ గోల్ లో పడదు.గురితప్పినపుడు ఆటుపోట్లు తప్పవు.మున్ముందు విజయాలకివే సోపానాలని పాజిటివ్ గా తీసుకుంటే శుభం.

ఆ.సౌమ్య said...

@ ఉమాదేవి గారూ
మీ వ్యాఖ్య చూసాక చాలా సంతోషమేసింది. నాతో ఏకీభవించినందుకు ధన్యవాదములు. కథ చెప్పకుండానే మీకు సినిమా చూపించానంటే నిజంగా ఆనందంగా ఉంది. "ప్రేమ నిత్యహరితం.వసివాడనిది,పస వీడనిది.".....చాలా బాగా చెప్పారండీ. సినిమాలలో ఈ ప్రేమ విషయమై ఒక విప్లవం ఎప్పుడు వస్తుందో ఏమో!

malli said...

సౌమ్యా..
మీ విశ్లేషణలు నిక్కచ్చిగా,సూటిగా ఉండడంతో పాటు ప్రోగ్రెసివ్ గా కూడా వుంటాయి...రెండు మూడు చోట్ల మీ కామెంట్స్ చదివినపుడు గమనించాను.
ఒక సలహా కూడా ఇవ్వాలనిపించింది...మరి?......

ఆ.సౌమ్య said...

మల్లి గారూ
ధన్యవాదములు. నా విశ్లేషణలు, కామెంట్లు మీకు నచ్చినందుకు చాలా సంతోషంగా ఉంది.

అయ్యో "మరి.." అని ఆగిపోయారేంటి, తప్పకుండా ఇవ్వండి. పొగడ్తలు, తెగడ్తలు, సలహాలు అన్నిటినీ ఒకే మనసుతో స్వీకరిస్తాను. తప్పకుండా ఆ సలహ ఏదో ఈ చెవిన పడేయండి. :)

వేణూ శ్రీకాంత్ said...

సౌమ్య, వ్యాసం బాగుంది. ప్రేమగురించి ఇంత విశ్లేషణతో సినిమా తీయడానికి ప్రయత్నిస్తూ అసలు ప్రేమించడానికి కారణమే సరిగా చూపించ లేదన్న మీ పాయింట్ నాకు చాలా నచ్చింది. మే బీ మొదటి 9 ప్రేమలూ ఆ ఆకర్షణవల్ల ఎక్కువకాలం నిలబడలేదేమో జెన్నీ వ్యక్తిత్వాన్ని కూడా ఇష్టపడటం వల్లనే తనని తనని మార్చుకోవడానికి సిద్దపడ్డాడేమో. అమ్మాయిల ప్రేమలో లోపం ఉన్నట్లు చూపిస్తే మహిళాప్రేక్షకుల ఆగ్రహానికి గురౌతాను అని భయపడ్డాడేమో లేదంటే మెజారిటీని దృష్టిలో పెట్టుకుని ఉండచ్చు.

జెన్నీ తల్లిదండ్రుల ప్రేమలో నిజాయితీలేదన్నది కాదు ప్రశ్న పెళ్ళిరోజు కూడా ప్రేమను వ్యక్తీకరించడానికి కుదరలేదంటే జీవితం ముందుకు వెళ్ళేకొద్దీ ప్రేమకి ఇచ్చేప్రాముఖ్యత వెనక్కివెళ్తుంది అని చెప్పడమే. దీన్నే చరణ్ ప్రేమతగ్గిపోవడమని అపోహ పడ్డాడు. ఇలాంటపుడే పక్కన కూర్చుని తీయని కబుర్లు చెబితేనే ప్రేమ ఉన్నట్లా భార్యాపిల్లలకోసం రేయింబవళ్ళు కష్టపడే వ్యక్తి మనసులో ప్రేమలేదా అని కూడా ఒక ప్రశ్న ఉదయిస్తుంది.

ట్రూత్ /డేర్ గేంలో ఆప్రశ్నే ట్రిక్కీ ప్రశ్న అతను ఒకరిలేషన్ షిప్ లో ప్రేమ సెక్స్ ల్లో దేనికి ప్రాముఖ్యతనిస్తాడు అని తెలుసుకోవడం కన్నా అతను ఉన్న రిలేషన్ షిప్ కి ఎంతగా కమిట్ అయి ఉన్నాడన్న విషయం తెలుసుకోవడానికి వేసిన ప్రశ్న. కాకపోతే ఇలాంటివి మన ప్రజన్స్ ఆఫ్ మైండ్ తో ఆడుకునేటువంటి ప్రశ్నలు. 30 ఏళ్లు ముందుకి వెనక్కి ఆలోచించక్కర్లేదు కానీ కనీసం పక్కన ఉన్న గర్ల్ ఫ్రెండ్ గురించి ఆలోచించాలికదా. ఆ జవాబు చెప్పినతను ఆ అమ్మాయిని వదిలించుకోడానికి సాయం అడగడం ద్వారా అతని కమిట్మెంట్ ని ఇంకా స్పష్టంగా చూపించాడు.

మనసు పలికే said...

సౌమ్య గారు, ఏమిటో.. అందరూ ఆరెంజ్ సినిమా గురించి బోల్డంత రాసేస్తున్నారు. నేనేమో ఇంకా చూడలేదు. సినిమా ఎలా ఉందో నాకు తెలియదు కానీ మీ టపా మాత్రం బాగుంది.:))

ఆ.సౌమ్య said...

@ వేణూ శ్రీకాంత్
ముందుగా నా టపాని ఓపికతో చదివి చక్కని విశ్లేషణతో కూడిన కామెంటు పెట్టినందుకు ధన్యవాదములు.

"జెన్నీ వ్యక్తిత్వాన్ని కూడా ఇష్టపడటం వల్లనే..." జెన్నీ వ్యక్తిత్వం ఎక్కడ చూపించాడు వేణూ? అదే కదా నా బాధ....జానూకి జీవితాంతం ఉండే ప్రేమ, నమ్మకం కావాలి అంతే తప్ప ఇంకేం చూపించాడు? ఒక బలమైన కోరిక ఒక వ్యక్తిత్వానికి అద్దం పట్టదు కదా.

మెజారిటీని దృష్టిలో పెట్టుకుంటే అసలు ఇలాంటి సినిమానే తియ్యకూడదు. రిజల్ట్స్ చూస్తే తెలుస్తున్నాదిగా మెజారిటీకి నచ్చలేదని. అమ్మాయి ప్రేమలో లోపాలు ఉండవా?....అందుకే పైన అన్నాను ఇలాంటి విషయాల్లోనే సినిమాలలో విప్లవం రావాలి. మెజారిటీ సినిమాని మెచ్చుకోరు అనుకుంటాం గానీ ప్రజల ఆలోచనలు మారుతున్నాయి ఒక అర్థవంతమైన సినిమా తీస్తే జనాలు తప్పక ఆదరిస్తారు. బొమ్మరిల్లు సినిమాకి బ్రహ్మ రథం పట్టలేదా? ఈ విషయాన్ని ఈ సినిమావాళ్ళు ఎప్పుడు గ్రహిస్తారో ఏమో!

జెన్నీ తల్లిదండ్రుల విషయంలో మీ పాయింట్ కరక్టే....ఆ రోజు, ఆ నిముషంలో ప్రేమని వ్యక్తపరచకపోయినా పెద్దగా కొంపలేమీ అంటుకుపోవు. కానీ బాధ్యతలు మరిస్తేనో, జీవిత భాగస్వామికి గౌరవం ఇవ్వకపోతేనో నిజంగానే కొంపలంటుకుంటాయి.

సినిమాలో చూపించాలనుకున్న విషయం మంచిదే, అర్థవంతమైనదే. కానీ చూపించిన తీరు, చర్చ నడిపించిన తీరు అస్తవ్యస్థంగా ఉంది.

ట్రూత్ /డేర్ గేం....మీరుచెప్పినది నిజమేనేమో! నాకు అలా తట్టలేదు. నాకు ప్రజన్స్ ఆఫ్ మైండ్ తక్కువేమో మరి ;). కానీ మీరు చెప్పినది విన్నాక దీని గురించి ఆలోచించాలనిపిస్తున్నాది. మరొక్కసారి ఆ సన్నివేశం చూస్తాను.

ఆ.సౌమ్య said...

@అపర్ణా
ధన్యవాదములు. ఇంకా చూడలేదా? మార్గదర్శిలో చేరు, నువ్వూ ఆరెంజ్ సినిమా చూడు. ఎందుకింత ఆలశ్యం? సినిమా ఒకసారి చూడొచ్చులే. నా విశ్లేషణ నచ్చినందుకు సంతోషం. :)

Shiva Bandaru said...

"ఒకమ్మాయి నీ దగ్గరకొచ్చి లవ్ or సెక్స్ అని అడిగితే....లవ్ అని సమాధానమిస్తాడు ఆ అబ్బాయి. అది తప్పంటాడు హీరో. అదెలా తప్పవుతుందో నాకర్థం కాలేదు. అది ఒక hypotheticle question, దీనికి సమాధానం చెప్పినప్పుడు ముందు 30 యేళ్ళు ఏమి జరిగింది, వెనుక 30 యేళ్ళు ఏమి జరిగింది అని ఆలోచించి చెబుతారా ఎవరినా బుద్ధి లేకుండా."

ఆ అబ్బాయి ఆల్రెడీ ప్రేమలో ఉన్నాడు కాబట్టి నో చెప్పాలి. లవ్ / సెక్స్ ఏది చెప్పినా తప్పే

ఆ.సౌమ్య said...

@ శివ
పర్లేదండీ, ఒకరు చెప్పిన విషయాన్ని మీరు మళ్ళీచెప్పినా తప్పులేదు. అందుకే మీ కమెంటు పబ్లిష్ చేసాను.

హ్మ్ అదే వేణూగారు చెప్పాక ఆ విషయం కాస్త బోధపడింది. Thanks for the comment!

వేణూరాం said...

నాకు మీ రివ్యు నచ్చిందా? నచ్చలేదా?....... అంటే కొంత నచ్చింది, కొంత నచ్చలేదు. :)
నాకు వేణుశ్రీకాంత్ గారి వ్యాఖ్య బాగా నచ్చింది.... నేను చెప్పాలని అనుకున్నవన్నీ ఆయన చెప్పేసారు. :)

సినిమా చూస్తున్నంతసేపూ ఎక్కడో ఓకచోట ప్రతీ ఒక్కరికీ "నా ప్రేమలో ఎంత నిజాయితీ ఉంది" అన్న ప్రశ్న రావడం, తమని తాము బేరీజు వేసుకోవడం కచ్చితంగా జరుగుతుంది. ఒకవేళ అదే సినిమా లక్ష్యమయితే అది నెరవేరినట్టే! hmm....

ఆ.సౌమ్య said...

@వేణురాం
thank you
ఆ కొంత నచ్చినదేమిటో, ఆ ఇంకొంత నచ్చనిదేమిటో చెబితే మేమూ సంతోషిస్తాంగా. :)

mrityunjay said...

నాకైతే సిన్మా బానేవుంది..నవల రాయాల్సిన భాస్కరు పొరపాట్న సిన్మా తీసి అంజనాప్రొడక్షన్స్ గ్రుహము ముంచాడని నా డౌటు.

ఆ.సౌమ్య said...

@ మృత్యుంజయ్ గారూ
హ హ హ భాస్కర్ నవల రాయాల్సిందంటారా....ఏమో నవలగా రాస్తే ఇంకాస్త క్లారిటీ వస్తుందేమో! Thanks for the comment!

నీ కోసమే నా అన్వేషణ .. said...

"ఇక నాగబాబు చేత చివర్లో చెప్పించిన మాటలు బావున్నాయికానీ అసలు ఆ పాత్ర ఎందుకు, ఆ పాత్ర ఉద్దేశమేమిటో అస్సలు బోధపడలేదు."


నాగ బాబు పాత్ర ద్వారా ఏం చెప్పాలనుకున్నాడనేదేనా మీకు అర్ధం కాని విషయం.

రామ్ అక్కా-బావ,నాగ బాబు ల పాత్ర ల ద్వారానే భాస్కర్ తన కధని చూపించే ప్రయత్నం చేసాడు.

" పది మంది ని ప్రేమించావ్ , ఏ ఒక్కరితోనూ తప్పుగా ప్రవర్తించ లేదు , ఎవరి దగ్గరా అబద్దం చెప్పలేదు . ఎవరినీ మోసమూ చెయ్యలేదు .నువ్వు చాలా బాగా ప్రేమించావ్ .. ఎంతో అద్భుతం గా ప్రేమించావ్ .. అయినా నీ చేతుల్లో మిగిలిందేంటి ? పదిమంది తోనూ ఎందుకు విడిపోయావో కారణాలు తప్ప , పది విషయాల్లోనూ పది కారణాలున్నాయ్ , కానీ ఒక్క ప్రేమ అయినా ఉందా ? కారణాల తో మిగిలి పోకూడదు . ప్రేమ ఆరంభం లో అద్భుతం గా ఉంటే ముగింపు ఇంకా అద్భుతం గా ఉండాలి . సముద్రమంత ప్రేమను పొందాలంటే జీవితపు చివరి అంచుల లోనే చూడగలం .అందుకు ఒక్కర్నే ప్రేమించాలి "
అని నాగ బాబు వెళ్తూ వెళ్తూ ఎప్పట్లాగే మరో పూలకుండీ కొనుక్కుని వెళ్తాడు .

బహుసా అతను ఆమె విసిరే పూలకుండీలలో ప్రేమను వెతుక్కుంటున్నాడేమో ? :-)
"ఆమె అరుస్తుంది . ఇది నిజం , కోపమొస్తే పూలకుండీలను మీద విసిరేస్తుంది - ఇదీ నిజం ." ఈ కారణం తో అతను ఒంటరిగా మిగిలి పోవాలనుకోలేదు .అతను ఆమె ను ప్రేమిస్తున్నాడు .ఆమెనుంచి ప్రేమను ఆశిస్తున్నాడు. అందుకే రోజుకో కుండీ గిఫ్ట్ ఇచ్చి ప్రేమను చాటుకుంటున్నాడు .

ప్రతి ఒక్కర్లోనూ లోపాలుంటాయ్. లోపాలు లేని ప్రేమలుండవు . ప్రేమించిన వ్యక్తి లో ఏదో ఒక లోపం వుందని , ప్రేమను వదిలెయ్యనవసరం లేదు . విడిపోవాల్సిన అవసరం అంతకంటే లేదు . ప్రేమించిన వ్యక్తి లో లోపాన్ని అర్ధం చేసుకుని మసులుకో గలిగితే సముద్రమంత ప్రేమ పొందటం ఎప్పటికీ సాధ్యమే . ఇద్దరూ మాట , మాట అనుకుంటం వల్ల చివరికి మాటలు మిగిలి పోతాయి . ఇద్దర్లోఎవరో ఒకరు సహనం గా వుండటం వల్ల ప్రేమ ఎప్పటికీ మిగిలి ఉంటుంది .

ఇదే నాగ బాబు పాత్ర వల్ల చెప్పాలి అనుకున్నది .
-------------------------------
"నేను ఒక అమ్మాయిని ప్రేమిస్తున్నానని చెప్పటమే అబద్దం అనిపిస్తుంది. నేను ప్రేమిస్తున్నాను అనే కన్నా నన్నే ఎక్కువగా ప్రేమించమంటున్నాను అనిపిస్తుంది . ఒక అమ్మాయ్ ని ప్రేమించలేక పోవటానికి కారణమే నేను . కారణాలతో మిగిలిపోకూడదు నేను "
అని రామ్ చివర్లో అనటానికి కారణమే నాగబాబు పాత్ర ..

malli said...

ఉత్తముల మహిమ నీరు కొలదీ తామర సుమ్మీ..
----కళా పూర్ణోదయం
సౌమ్యా...ఇదే నా సలహా.

ఆ.సౌమ్య said...

@ నీకోసమే నా అన్వేషణ
నాగబాబు చేత చివర్లో చెప్పించిన డైలాగులు చాలా అర్థవంతంగా ఉన్నాయి అనే కదండీ నేను టపాలో రాసాను. నాకు అర్థం కానిది ఆ పాత్ర ఔచిత్యం. ఎంతసేపు ఆ భార్యాభర్తలిద్దరూ కొట్టుకోవడమే చూపించాడుగానీ ప్రేమగా ఉన్న ఒక్క సీనూ లేదు. ఒకరిలో ఉన్న లోపాల్ని అర్థం చేసుకుని కూడా ప్రేమించవచ్చు కానీ ఏ క్షణాన నెత్తి పగులుతుందో కూడా తెలియకుండా ప్రేమించడం అంటే అసాధ్యమేమో! కాబట్టి ఆ పాత్ర చేత ఆ మాటలు చెప్పించడం బాలేదు. అలా ఎప్పటికీ కొట్టుకునేవారు విడిపోతేనే మంచిది. అలా కొట్టుకుంటూ సముద్రమంత ప్రేమని పొందడం కష్టం! ఒక అసాధ్యమైన విషయాన్ని చూసి, విని హీరో మారడం (అదీ కొంతవరకే) అన్నదే మింగుడుపడట్లేదు.

హీరో చివర్లో చెప్పిన మాటలు నాకూ నచ్చాయి. ఇతరులని ప్రేమించక తనని మాత్రమే ప్రేమించుకుంటున్నాడు అన్న realization బావుంది. కానీ ఒక్కటి, తనని ఎక్కువగా ప్రేమించుకునేవాడే ఇతరులని కూడా బాగా ప్రేమించగలడు. అది ఈ సినిమాలో ఎందుకు వర్క్ అవుట్ కాలేదో మరి! :D

Mauli said...

హాయ్ సౌమ్యా...ఈ మూవీ భాస్కర్ తన చుట్టూ ఉన్న అనేక మంది నుండి గమనించిన విషయాలను ఒక్క కధ లో చక్కగా ఇమిడ్చి చెప్పాడు. మీరూ గమనించి ఉంటె తప్ప నచ్చదు..చాలా కామన్ విషయాలు కాని ఓవర్లూక్ చేసేవాళ్ళే ఎక్కువ .

>>>జానూ ని ప్రేమించినప్పుడు కూడా తనలో ఏమి చూసాడు

తింగరి అన్న విష్యం కాకుండా ఎందుకు అనేది ౩ సార్లు సినిమా లో చెప్పాడు. మనకి ౧౦ సినిమాలు చూసాక , Trials చూసి కొత్త సినిమా నచుతుందో లేదో నిర్ణయించుకో గలము...(తర్వాత బాగుంటుందా లేదా అన్నది ఆలోచిన్చానక్కరలేదు :)

మీరు రివ్యూ చదివి చూడటం వాళ్ళ, ఏ మాత్రం శ్రద్ద పెట్టలేకపోయారు ...ఇది మీ పెద్ద వ్యాసమే చెబుతుంది ...(సినిమా గురించి పెద్దగా వ్రాయలేదు)

>>>>ప్రపంచంలో ఎవరి ప్రేమలోనూ నిజాయితీ లేదని చూపడం మాత్రం నాకు అస్సలు నచ్చలేదు.
ప్రపంచము లో ఎవరెవరు ఎలా ఉన్నారో కళ్ళకు కట్టినట్లు చెప్పారు ...ప్రభు చివరి డైలాగ్ ఎందుకు అన్నాడో మీకు అర్ధం కాకపోతే మీరు ఏమి వ్రాసి ఏమి ఉపయోగం.

>>>లవ్ అని సమాధానమిస్తాడు ఆ అబ్బాయి. అది తప్పంటాడు హీరో.

ఎంతో విశ్లేషణలు చేసే మీరు ఈ చిన్న విషయం అర్ధం చేసుకోలేకపోవడానికి కారణం, మీరు సినిమా చూసిన విధానమే...(మిమ్మల్ని విమర్శించే ఉద్దేశ్యం ఏమాత్రం లేదు , కాకుంటే థియేటర్ లో ఈ సినిమా చూసేప్పుడు చాల శ్రద్ద అవసరం.. సీన్ కి సీన్ కి మధ్య ఆలోచించడానికి కూడా గ్యాప్ ఉండదు చాలా చోట్ల :) )

>>>సినిమా చూస్తున్నంతసేపూ ఎక్కడో ఓకచోట ప్రతీ ఒక్కరికీ "నా ప్రేమలో ఎంత నిజాయితీ ఉంది
ప్రతి ఒక్కరికీ వస్తే ఈ సినిమా హిట్ అయ్యేది ...తర్వాతి సినిమాలన్నీ ఫట్ అయ్యేవి ...సో అలా అనిపించకూడదు. తెలుగు సినిమా ౪ కాలాలు బాగుండాలి...

ఆ.సౌమ్య said...

@ మల్లి గారూ
మీరు మరీ అంత సంస్కృతంలో చెప్పేస్తే నాకెలా అర్థమవుతుందండీ! కొంచం తెలుగులో చెబితే మీ సొమ్మేం పోయిందండీ!....హహహహ సరదాకన్నానులెండి. :D

నాకు అర్థమయింది, thank you somuch!

నీ కోసమే నా అన్వేషణ .. said...

emandee kallu bayarlu kammutunnay , okasari vesina comment inni sarlu kanipistundi , mee blog lo commentmodeterate option vundi gaa vaatilo vunna extra 7 + idi delete cheyyandi pls..

ఆ.సౌమ్య said...

@ నీకోసమే నా అన్వేషణ

హహహ మీరు చెప్పకముందే డిలీట్ చేసేసానండీ :D

మొదట పోరపాటున అన్నీ పబ్లిష్ చేసా, తరువాత వరుసపెట్టి అన్నీ డిలీట్ కొట్టాను.

ఆ.సౌమ్య said...

@ mouli
నాకు అర్థమయినంతవరకూ నేను రాసానండీ. నేను అర్థం చేసుకోకపోవడం వల్ల ఏమి ఉపయోగం ఉందో లేదో నాకు తెలీదుగానీ నాకు మాత్రం ఇంతే అర్థమయింది.

for your information...ఈ సినిమా మీద వచ్చిన రివ్యూలు నేను ఎక్కువ చదవలేదు. కావాలనే అలా చేసాను. సాధారణంగా సినిమాల మీద వచ్చే అన్ని రివ్యూలు చదువుతూ ఉంటాను, కానీ ఈ సినిమాకి మాత్రం అన్నీ చదవలేదు. ఒక్కటో, రెండో చదివానేమో, కానీ వాళ్లేమి చెప్పారో నాకు గుర్తు కూడా లేదు. నేను కావాలనే ఈ సినిమాల మీద వచ్చిన రివ్యూలను సాధ్యమైనంత వరకూ aviod చేసాను. కాబట్టి నా విశ్లేషణపై మిగతా రివ్యూల ప్రభావం ఉంది అనుకోవడం భావ్యం కాదు. మీకు నచ్చినా నచ్చకపోయినా నన్ను నన్నుగానే గుర్తించండి ప్లీజ్.

మరి మీరు చూసినంత శ్రద్ధగా నేను చూడలేకపోయానేమో!. మీరు అంత సునిశితంగా చూసారు కాబట్టి మీరే ఎందుకు ఒక రివ్యూ రాయకూడదూ ఈ సినిమా గురించి? మీరు రాస్తే గనక తప్పకుండా నాకు చెప్పండేం...నేను చూడని విషయాలు, నాకు అర్థంకాని విషయాలను మీ రివ్యూలో చదివి నేర్చుకుంటాను.

మీరు, ప్రతీ సీనుని చాలా బాగా అర్థం చేసుకున్నాను అంటున్నారు కాబట్టి మీరు తప్పకుండా రివ్యూ రాయాలని request + Deamand చేస్తున్నాను. :D

సుజాత said...

అద్భుతంగా రాశావు సౌమ్యా! ముఖ్యంగా వ్యాసంలో చివరి వాక్యం చాలా బాగుంది. ఎంతో సీరియస్ గా చూశావన్నమాట సినిమా!

మొత్తానికి డైరెక్టరు సక్సెసే కానీ, చాలా మంది ప్రేక్షకులు సరిగా రిసీవ్ చేసుకోలేకపోయారేమో అనిపిస్తోంది, నీ రివ్యూ, వేణూ శ్రీ రివ్యూ లు చదివాక.

సవ్వడి said...

సౌమ్య! నేను నేతో పూర్తిగా ఏకీభవిస్తున్నాను.
ఓ కథను ఎంతవరకూ తీసుకోవాలో అంతవరకు తీసుకున్నావు. దానికి తగ్గట్లే నీ విశ్లేషణ ఉంది. అంతకన్నా ఎక్కువ అర్థం చేసుకోవలసిన అవసరం లేదు.
నాకు మాత్రం ఈ సినిమా చూడడానికి థైర్యం చాలట్లేదు..:):)

Mauli said...

parledu, mothaniki mimmalni rechcha gottinatlu gaa anipistondi :)

naa samaadhanalu mundu comment lone cheppanu..

movie choosi mee opinion chepparu...vyasam chadivi naa opinion cheppanu...

meeru chadivina oka review venu gaaridi naaku telisi ..adi baane undi ...

so nenu annadi tappu review lu chadivarani kaadu ..


@మీరు అంత సునిశితంగా చూసారు కాబట్టి మీరే ఎందుకు ఒక రివ్యూ రాయకూడదూ ఈ సినిమా గురించి?

sunisitham gaa choodaledu...choosanu..nachindi ..

nachaledu annavari blog lo comment cheyyakoodadu ani ippude telisindi ..alanti topics nenu ide first chadavadam :)


inka yevaro cheppinatlu gaa, first commentor ni fallow ayye alavaatu naaku assalu ledu :)

naa abhiprayalu ippatiki cheppanu...review avasaram ledu...avi chaduvukondi anthagaa kavali ante :)

oka review ki comments kooda kalistene paripoornatha vastundi...yendukantE yevvaroo sampoornam gaa vrayaleru...


Venu garu vrasaaru...daanipai inka charcha jarigithe baagundedi :)

ఆ.సౌమ్య said...

@సుజాత గారూ,
ధన్యవాదములు. సినిమా సీరియస్ గా ఆనే చూసానండీ, అది సీరియస్ గా చూడవలసిన సినిమావే కాకపోతే దర్శకుడు ఏమి చెప్పదలుచుకున్నాడన్నది సరైన పద్ధతిలో ఇంకాస్త క్లారిటీతో చెప్పి ఉంటే ఇది ఒక మంచి సినిమ అయుండేది. ప్రజలకి ఎక్కువగా చేరేది కూడా.

@సవ్వడి
thank you somuch. అలా భయపడకండి. ఇది ఒక్కసారైనా చూడాల్సిన సినిమావే...చూడండి చూసి మీ అభిప్రాయం చెప్పండి.

ఆ.సౌమ్య said...

@ Mouli
మీరు నన్ను రెచ్చగొట్టడమేమిటండీ బాబూ...మీరేదేదో ఊహించేసుకుంటున్నారు. అంత లేదు. :)

వ్యాసం చదివి మీ అభిప్రాయాం చెప్పడాన్ని నేను స్వాగతిస్తున్నాను, అసలందుకేగా వ్యాసం రాసినది. కాకపోతే మీరు "అది అర్థం చేసుకోలేదు, ఇది సరిగ్గా చూడలేదు. మీకింతే అర్థమయిందన్నమాట, మీకేమీ అర్థం కాలేదన్నమాట, మీరు సరిగ్గా చూడలేదన్నమాత, ఇంకా శ్రద్ధగా చూడాల్సింది" ఇలా అన్నారు కదా అది కొంచం ఎబ్బెట్టుగా అనిపించింది.

లోకో భిన్న రుచిః అన్నట్టు ఒక్కొక్కరికీ ఒక్కోటి నచ్చుతుంది. ఒక్కొక్కరు ఒక్కోలా చూస్తారు. మీరు నేను సరిగ్గా ఆర్థం చేసుకోలేదు, సునిశితంగా చూడలేదు అన్నారు కాబట్టి, అలా మీరు చూస్తే మిమ్మల్ని రాయమన్నాను. నేనేమైనా మిస్ అయి ఉంటే ఉండొచ్చు. మీరు రివ్యూ రాస్తే అదేదో తెలుసుకుంటాను కదా.

నచ్చనివాళ్ళని కామెంటు పెట్టకూడదనే మీ అభిప్రాయం తప్పు. నిరభ్యంతరముగా పెట్టొచ్చు. అసలు చర్చే అక్కర్లేకపోతే ఇంత వ్యాసం రాయడమెందుకు, మీరంత చదవడమెందుకు చెప్పండి. అలా ఏమి అనుకోకుండా మీ కామెంట్లు పెట్టండి. కాకపోతే నన్ను సరిగ్గా చూడలేదు అని విమర్శించేకంటే మీ పాయింటేమిటో చెబితే బాగుంటుంది.

భాను said...

సౌమ్య గారూ , భాస్కర్ ఇది చదివితే ఆయనకు గుండె అగుతుందేమో:) పూర్తిగా చదివే టైం ఇప్పుడు లేదు కొంత చదివా చాలా పెద్ద విశ్లేషణ రాసారుగా , పూర్తిగా చదివాక నా కామెంట్, చదివినంత వరకు నచ్చింది

శరత్ 'కాలమ్' said...

"దర్శకుడు ఏమి చెప్పదలుచుకున్నాడన్నది సరైన పద్ధతిలో ఇంకాస్త క్లారిటీతో చెప్పి ఉంటే ఇది ఒక మంచి సినిమ అయుండేది. ప్రజలకి ఎక్కువగా చేరేది కూడా"

మీ టపా ఇంకా చదవ లేదు - కామెంటు మాత్రమే చదివి స్పందిస్తున్నా. మీ పై అభిప్రాయంతో వందపాళ్ళు ఏకీభవిస్తున్నా. మంచి కాన్సెప్టుని దర్శకుడు కంగాళీ చేసిపడేసాడు. షాజన్ పదాంసీ పార్ట్ తీసినంత క్లారిటీతోనే గనుక ఈ సినిమా కూడా తీసివుంటే, అలాంటి మంచి హీరోయిన్ని పెట్టుకునివుంటే ఈ సినిమా మరో బొమ్మరిల్లు అయివుండేది.

a2zdreams said...

good review

ఆ.సౌమ్య said...

@భాను
హహహ అంతపని జరుగుతుందంటారా! సరేనండి పూర్తిగా చదివి మళ్ళీ కామెంటు పెట్టండి...అప్పటివరకు సగమే ధన్యవాదములు. :D

ఆ.సౌమ్య said...

@శరత్
thank you. మీరు కూడా నాతో ఏకీభవించినందుకు సంతోషం. షాజన్ పదాంసీ ఏమిటండీ, నాకర్థం కాలేదు? హీరోయిన్ విషయంలో మీరు చెప్పినది కరక్టే...తింగరివేషాలు వెయ్యలేనివాళ్ళనెవరినైనా పెట్టుకుని ఉంటే బాగుండేది.

నా టపా పూర్తిగా చదివి మీ అభిప్రాయం చెప్పండి.

@ a2zdreams
Thank you so much!

శరత్ 'కాలమ్' said...

ఇది మరీ బావుంది - సినిమా అంతా చూసి చేంతాడంత రివ్యూ వ్రాసీ షాజాన్ పదాంసీ అంటే ఏంటంటే ఏం చెబుతాం :)) నా వల్ల కాదు బాబోయ్. ఈ ఆరెంజ్ అజ్ఞానికి ఎవరయినా తెలియపరచండి :))

మంచు said...

ఇంతమంది ఇంత ఇదిగా చెప్తుంటే నాకు చూడలనిపిస్తుంది ... కానీ ఎలా...మా ఊళ్ళొ లేదే :(
కానీ ఒక్కొరు ఒక్కొ ఎంగిల్ నుండి అనాలిసిస్ చేసిపాడేసారు... ఇప్పుడు నేను ఈ సినిమా చూస్తే ..చూస్తున్నంత సేపూ ఇవే గుర్తుకువస్తాయేమో

ఆ.సౌమ్య said...

@శరత్
అబ్బ, చంపారుపొండి...ఆ రెండో హీరోయిన్ సంగతా మీరు చెప్పేది. సినిమా చూసేసానుగానీ ఆ పిల్ల పేరు అస్సలు గుర్తులేదండీ. అంటే ఆమె పాత్ర, నటన నామీద అంతే ముద్రవేసిందన్నమాట :P

ఆ.సౌమ్య said...

@ మంచు పల్లకి
హిహిహి ఏం చేస్తాం...పాపం ఆ సినిమా మీ ఊరొచ్చేవరకు ఎదురుచూడాల్సిందే. లేకపోతే ఓ పని చెయ్యండి...ఇండియా వచ్చి ఆ సినిమా చూసేసి మళ్ళీ వెనక్కి వెళ్ళిపోండి. :P

సినిమా చూసేటప్పుడూ మా అందరి రివ్యూలు గుర్తొస్తూ ఉంటే ఆ అనుభవం ఎలా ఉందో మీరో పోస్ట్ రాసేయండి. :D

మంచు said...

మా ఊరొచ్చి వెళ్ళిపొయింది. ఇక సి డి కొసం చూడాలి

Mauli said...

pls check here :)

http://mtarigopula.blogspot.com/2010/12/blog-post.html

Mauli said...

@- సినిమా అంతా చూసి చేంతాడంత రివ్యూ వ్రాసీ

Sarat gaaru keka :)


Sowmya...

meeru cinimaa direct chestE memu choostam anela vundi nannu meeru review vraayamanadam :)

mee review baagundanna vallalo cinimaa choosinaa vallu entha mandi???


sare choosinavalla review ki mee review ki ponthana undaa ? ayinaa vallu bane undannaru :)


cinimaa ni nisitham gaaa chooside review lu vrayalanukone vaaru maatrame...nenu kaadu , nenu kaadu :)

Mauli said...

నచ్చనివాళ్ళని కామెంటు పెట్టకూడదనే మీ అభిప్రాయం తప్పు. నిరభ్యంతరముగా పెట్టొచ్చు. అసలు చర్చే అక్కర్లేకపోతే ఇంత వ్యాసం రాయడమెందుకు, మీరంత చదవడమెందుకు చెప్పండి. అలా ఏమి అనుకోకుండా మీ కామెంట్లు పెట్టండి. కాకపోతే నన్ను సరిగ్గా చూడలేదు అని విమర్శించేకంటే మీ పాయింటేమిటో చెబితే బాగుంటుంది.


mee vyaasam nenu motham chadavalekapoyaanu andi ...try chesaanu inko peraa inkoo peraaa...

mmmhoooo linu ko comment pettaleka yedo akkadakkada cheppanu :)

ఆ.సౌమ్య said...

@మంచు
అయితే వేచి చూడండి. :)

ఆ.సౌమ్య said...

@ Mouli
మీ కామెంట్లన్నీ చదివిన తరువాత కూడా ఈ సినిమాలో మీకు నచ్చిన అంశం ఏమిటి అన్న విషయం బోధపడలేదు. అయితే ఒక్కటి మాత్రం అర్థమయింది, మీకు ఈ సినిమా విపరీతంగా నచ్చింది. ఎందుకు నచ్చిందో మీరు ఏ కామెంటులోనూ రాయలేదు.

సినిమా సునిశితంగా చూసేది రివ్యూ రాయడం కొరకే అనే మీ అభిప్రాయం తప్పు. కనీసం నా విషయంలో తప్పు. నేను రివ్యూలు రాయడం కోసం చూడను. చూసిన తరువాత రాయాలనిపిస్తే రాస్తాను. కానీ ఏ సినిమా అయినా, ఎవరైనా దృష్టి పెట్టే చూస్తారు కదండీ...బోలెడు డబ్బులు పెట్టి వెళ్ళి అల్లాటప్పాగా ఎవరైనా చూసొస్తారా? :D

నేను కాదు నేను కాదు అంటున్నారుగానీ....మీరు ఒక ప్రయత్నం చెయ్యొచ్చు కదా. ఒకసారి రివ్యూ రాసి చూడండి

నీ కోసమే నా అన్వేషణ .. said...

నాకు అర్థం కానిది ఆ పాత్ర ఔచిత్యం. ఎంతసేపు ఆ భార్యాభర్తలిద్దరూ కొట్టుకోవడమే చూపించాడుగానీ ప్రేమగా ఉన్న ఒక్క సీనూ లేదు. ఒకరిలో ఉన్న లోపాల్ని అర్థం చేసుకుని కూడా ప్రేమించవచ్చు కానీ ఏ క్షణాన నెత్తి పగులుతుందో కూడా తెలియకుండా ప్రేమించడం అంటే అసాధ్యమేమో! కాబట్టి ఆ పాత్ర చేత ఆ మాటలు చెప్పించడం బాలేదు "

ఆ పాత్ర ఔచిత్యం ?

"ఈ ప్రశ్నకు జవాబు కూడా భాస్కర్ స్క్రిప్టులో స్పష్టంగానే ఉంది.తరచూ అనుమానంతో తిట్ల దండకాన్ని మొదలుపెట్టి బాల్కనీ లోంచి పూల కుండీ విసిరేసే భార్య కోసం.. నాగబాబు మళ్ళీ సాయంత్రానికి కొత్త పూలకుండీ కొనుక్కుని తీసుకువెళ్ళే దృశ్యాన్ని పాసింగ్ సీన్ లా వదిలేసే ప్రేక్షకులు దర్శకుడు సినిమాకు ముగింపు ఇవ్వడంలో కన్ఫ్యూజ్ అయ్యాడనే ఆరోపిస్తారు. దృశ్య వ్యాకరణం అంతో ఇంతో తెలిసిన వారెవరూ నాగబాబు పాత్రకున్న ఇంపార్టెన్స్ ను విస్మరించడానికి వీల్లేదు. బొమ్మరిల్లు క్లయిమాక్స్ లో చూపించిన తండ్రీ కొడుకుల సుదీర్ఘ సంభాషణను.. దర్శకుడు ఈ చిత్రంలో నాలుగైదు నిమిషాలు మాత్రమే కనిపించే నాగబాబు పాత్రతో సాధించాడు. కారణాలతో విడిపోవడం కాదు.. ప్రేమించడానికి కారణాలు కొత్తవి ఎప్పుడూ ఉంటాయి.. వాటిని గుర్తిస్తూ పోవాలనే అర్థంలో హీరో రామ్ తన బావతో చెప్పిన మాటలు.. మానసికంగా అతడిలో వచ్చిన మార్పును సూచిస్తాయి. అంతా జరిగాక, చివర్లో హీరో మళ్ళీ ఈ అమ్మాయి అప్పుడెలా ఉండేది.. ఎంత అల్లరిగా అమాయకంగా నవ్వేది.. అదంతా ఇప్పుడుందా అని ప్రశ్నించే సన్నివేశమే కొంత అబ్సర్డ్. జీవితం నిన్నలా ఉండదు. అలాగే ప్రేమ కూడా. ప్రేయసి నవ్వు కూడా..నిజానికి ఈ కథను.. నాగబాబు పూల కుండీని కొనుక్కుని ఇంటికి వెళ్ళే దగ్గరే ఆపేయొచ్చు. కానీ, పాపులర్ ఫార్మాట్ లో ఇంకొంత క్లారిటీ అవసరం అనుకున్నాడు భాస్కర్. ఎంతకాలం కలిసి ఉంటారో తెలియదు.. ఉన్నన్నాళ్ళూ ప్రేమగా జీవిస్తారు.. వాళ్ళనలా వదిలేద్దామని హీరోయిన్ తండ్రితో చెప్పిస్తాడు. కథకంతా.. ఒక సూత్రంగా నిలిచిన ప్రకాశ్ రాజ్.. చివరి దృశ్యంలో ఇప్పుడు నేను నా భార్య దగ్గరకు వెళ్ళాలి అని కారెక్కుతాడు.ఇంకెంత క్లారిటీ కావాలి? "

http://anekavachanam.wordpress.com/2010/12/02

ఆ పాత్ర ఔచిత్యం ?
ఈ ప్రశ్న కి ఆన్సర్ చాలా ఆలోచించా, చాలా వెతికా అయితే పైన "శ్రీధర్ బాబు " గారి మాటల్లో నాక్కొంచెం కనిపించింది .
ఇంతకంటే ఎక్ష్ప్రెస్ చెయ్యటం నాకు తెలీదు . అందుకే జస్ట్ కాపీ , పేస్ట్ :D


"
తనని ఎక్కువగా ప్రేమించుకునేవాడే ఇతరులని కూడా బాగా ప్రేమించగలడు. అది ఈ సినిమాలో ఎందుకు వర్క్ అవుట్ కాలేదో మరి!"

నిజమేనండి. నేనూ ఒప్పుకుంటా . "తనని ఎక్కువగా ప్రేమించుకునేవాడే ఇతరులని కూడా బాగా ప్రేమించగలడు".అయితే "తనని తాను ప్రేమించుకోవటం వేరు , తననే ప్రేమించమని ఎదుటవాళ్ళని అడగటం వేరు ," చరణ్ ఇక్కడ realize అయ్యింది బహుశా రెండో విషయానికి అనుకుంటా .

@సవ్వడి గారు
నాకు మాత్రం ఈ సినిమా చూడడానికి థైర్యం చాలట్లేదు..:):)

మీరు ఎందుకలా అన్నారో అర్ధం కాలేదండి .


"

ఆ.సౌమ్య said...

@ నీకోసమే నా అన్వేషణ
లింక్స్ ఇచ్చినందుకు thanks! ఆయన చెప్పినదంతా బాగానే ఉంది. కానీ నేను చెప్తున్న పాయింట్ వేరు. ప్రేమకి సరి అయిన కారణం చూపించి ఆ తరువాత ఈ చర్చ అంతా పెట్టి ఉంటే ఆరెంజ్ ఒక మంచి సినిమా అయి ఉండేది....ఇది నా పాయింట్.

ఇక నాగబాబు పాత్ర విషయానికొస్తే....ఆయన చేత చివర్లో చెప్పించిన డైలాగ్స్ అన్నీ చాలా బావున్నాయి. కానీ ఆ పాత్ర ఔచిత్యం ఇంకా చెప్పాలంటే అంత మంచి డైలాగ్స్ ఆ పాత్ర చేత చెప్పించడం నాకు convincing గా అనిపించలేదు (మీరిచ్చిన లింక్ చదివిన తరువాత కూడా). కారణం నేను ఇంతకుముందే చెప్పాను. మళ్ళీ రాస్తున్నాను.

"ఎంతసేపు ఆ భార్యాభర్తలిద్దరూ కొట్టుకోవడమే చూపించాడుగానీ ప్రేమగా ఉన్న ఒక్క సీనూ లేదు. ఒకరిలో ఉన్న లోపాల్ని అర్థం చేసుకుని కూడా ప్రేమించవచ్చు కానీ ఏ క్షణాన నెత్తి పగులుతుందో కూడా తెలియకుండా ప్రేమించడం అంటే అసాధ్యమేమో! కాబట్టి ఆ పాత్ర చేత ఆ మాటలు చెప్పించడం బాలేదు. అలా ఎప్పటికీ కొట్టుకునేవారు విడిపోతేనే మంచిది. అలా కొట్టుకుంటూ సముద్రమంత ప్రేమని పొందడం కష్టం! ఒక అసాధ్యమైన విషయాన్ని చూసి, విని హీరో మారడం (అదీ కొంతవరకే) అన్నదే మింగుడుపడట్లేదు."

చందు said...

చాలా బాగా రాశారు. ప్రేక్షకుడు సినేమా లో హీరొ తో పాటుగా సాగిపోయేలా తియ్యకపోతే హిట్ అవ్వడం చాలా కష్టం. చాలా మటుకు మనకి హీరొ అర్ధం కాడు. అర్ధం అయ్యేలోపు సినేమా ఐపోతుంది. తొమ్మిది మందిని ప్రేమించిన వాడి ప్రేమ ని మనం నమ్మం. హీరొ మీద నమ్మకం లేకుండా హీరొ చెప్పే ప్రేమని ఎందుకు ఒప్పుకుంటాము.

ఆ.సౌమ్య said...

@చందు
బాగా చెప్పారు. హీరో దే ప్రధాన పాత్ర అయినప్పుడు అతనితో పాటు ప్రేక్షకుడిని నడిపించకపోతే సినిమా ఫ్లాప్ అవుతుంది, అది నిజమే.

మీకు నచ్చినందుకు సంతోషం, ధన్యవాదములు. :)

శివరంజని said...

ఆరెంజ్ నచ్చిందా ????????నచ్చలేదా???????? ఏమో ????????నేనీ సినిమా చూడలేదు ...

కాని నువ్వు నచ్చావు ..ఎన్ని రోజులయింది మేడం పోస్ట్ రాసి ??????.ఇప్పడికయినా రాసావు కదా ...అందుకే నచ్చావు అంటున్నా ..

ఏమిటో!!! లేట్ గా రాసే వారసత్వం నా నుండి నువ్వు తీసుకున్నావా ??????
ఈ మద్యన ఏకవచనం ప్రవాహం లా వచ్చేస్తుంది ..... ఇబ్బంది ఏమి లేదు కదా

ఆ.సౌమ్య said...

@ శివ రంజనీ
అమ్మా శిజ్జనకా నేను పోస్ట్ రాసిన మూడు రోజులకొచ్చి చూసావు. నువ్వు టపాలు రాయడమే లేట్ అనుకున్నా, చూదడం కూడా లేటానా. :P

నేను టపా ఆలశ్యంగా వేసానా...అంటే మరీ మరీ సహవాసదోషం....నీ లేటు టపాలు చదివి చదివి నేనూ లేటుగా టపాలు వేస్తున్నా. :D

అవును ఇంతకీ ఆరెంజ్ ఎందుకు చూడలేదు నువ్వు?....వెంటనే చూసొచ్చి నీ అభిప్రాయం కూడా రాసేయ్. బ్లాగుల్లో ఇప్పుడిదొక కొత్త ట్రెండ్...ఆరెజ్ చూసి అభిప్రాయం రాయడం. ;)

నీకంటే పెద్దతలకాయినే అయినా అభిమానంతో చేసే ఏకవచన ప్రయోగం ఫరవాలేదమ్మాయ్, నేను ఏమీ అనుకోను. నాకలాంటి పట్టింపులేమీ లేవు సుమీ :) స్వేచ్చగా నువ్వు అనేయ్.

Lakshmi P. said...

సౌమ్య గారు నేను అరేంజ్ సినిమా చూడలేదు, కానీ మీ విశ్లేషణ చాలా బాగుంది.

ఆ.సౌమ్య said...

@లక్ష్మి గారూ
ధన్యవాదములు... నా రివ్యూ నచ్చినందుకు సంతోషం. నా బ్లాగుకి మీకు స్వాగతం.

Sensitive Fragrance said...

sowmya garu! nijanga naa manasulo ni bhavale meru mataluga visleshincharani pistondi ...nijam
ga mee vyasam adhbhutam :)..orange naku nachindi bhaskar way of thinking kuda nachindi, kani cinema fail ayinidi(:ade konchem badha ga vundi, patalu adhbhutam kada.."rooba rooba" naku chala baga nachindi, mari meku ye pata nachindi ?

ఆ.సౌమ్య said...

@Sensitive Fragrance
Thank you so much.
నాతో ఏకీభవించినందుకు ధన్యవాదములు. అన్ని పాటలు బాగానే ఉన్నాయండి. సిడ్నీ నగరం పాట ఒకటీ, చిలిపిగ చుస్తావలా పాట ఒకటీ బాగా నచ్చాయి.

Sensitive Fragrance said...

yes yes! chilipiga chustavala.......bagundi:)

Hmmm said...

నువ్వు ఎవరినైనా ప్రేమించావా అని ఇంకేవర్నైనా అడిగితే అందరూ "హేబ్బే...ఛ ఛా ప్రేమా నేనా..." అనో లేక "ఎందుకు ప్రేమించలేదు... 10th క్లాసు లో ఫలానా..." అనో లేక "మా ఆయన్ని / మా ఆవిడని..." అనే అంటారు కానీ "పుట్టిన దగ్గరనుంచి నేను ప్రేమిస్తూనే వున్నాను...మా అమ్మని , మా నాన్నని , మా చెల్లి తమ్ముడులనీ ..అండ్ నన్ను కూడా...." అని ఎ నూటికి ఒక్కరో వెయ్యికి ఒక్కరో చెబుతారు... ప్రేమ అనే ఇంత అందమైన నిఘూడార్థాన్ని (what a discovery what a discovery...thank you thank you ) దాగి వున్న పదాన్ని పట్టుకున్ని " ప్రేమ ఒక వ్యక్తి పైన కొద్ది కాలం మాత్రమె వుంటుంది" అని చెప్పటం భాస్కర్ చేసిన మొదటి తప్పు... సరే... తప్పో వొప్పో ఇదే విషయాన్నీ నమ్మిన ఒక వ్యక్తి ని తన హీరో గా చూపిస్తూ... అదే సిద్ధాంతాన్ని ఫాలో అయ్యి ఎనిమిది / తొమ్మిది మంది అమ్మాయిల్ని 'నిజాయితీ' తో వదిలివేసిన వ్యక్తే లాస్ట్ లో "కారణాలు తప్ప నాకు ఏమి మిగల్లేదు మొర్రో..." అని వాపోయి ఈ స్వార్థ పూరితమైన (నిజయీతి అటక ఎక్కింది) కారణం వల్ల "జానూ నే నా జాన్" (అలాంటి డైలాగ్ ఏమి లేదు సినిమాలో ...జస్ట్ ప్రాస కోసం వాడా ;)) అని అనిపించటం అంత కంటే పెద్ద తప్పు.
ఇహ పోతే ప్రేమను 'పొందలేకపోవటం / పంచకపోవటం' కొంత మందికి వచ్చే జబ్బు అయితే... నాకు సముద్రమంత ప్రేమ కావలి అని అనటం అనేది మరో వింతైన జబ్బు...(అయినా జాను క్యారెక్టర్ కి ఏమి పొయ్యే కాలమండీ ...పాపం ఇంట్లో అమ్మ నాన్న అందరూ బానే 'ప్రేమ' గా చూసుకుంటున్నారు గా...) కోరుకుంటే వచ్చేది ప్రేమ కాదు... what i mean here is ఒకరి ప్రేమ పక్కవాడి పైన ఆధారపడి వచ్చేది కాదు...వీలైతే మనలో మనం చూసుకోలేని ప్రేమని ఇంకొకరి ప్రేమ గమనిన్చుకునేలా చేస్తుందేమో... ఇహపోతే ప్రేమకి టైం కి సంబంధం లేదు... అన్నిటికీ మించి ప్రేమకూ ప్రేమను ఎక్ష్ప్రెస్స్ చెయ్యటానికి చాలా వ్యత్యాసం వుంది...ప్రేమ ను వ్యక్తపరిచే విధానం సమయాన్ని బట్టి మారుతుంది కానీ ప్రేమ తగ్గింది అని అక్కడ అర్థం కాదు... పోతే ప్రేమ ఒకరి పై నుంచి ఇంకొరి పైన మళ్ళినప్పుడు...అంతకముందు వుంది 'నిజం' ఐన ప్రేమ కాదు... ఇప్పుడు కొత్తగా వచ్చేదీ ప్రేమ కాదు... ఛ ఛా ప్రేమ రావటం పోవటం ఏంటి... ప్రేమ వుంటుంది... జస్ట్ like HEAT, LIGHT, ... ప్రేమ వల్ల నిజాయితీ వుంటుంది కానీ నిజాయితీ వల్ల వుండేది ప్రేమ కాదు...(ఇక్కడే ఆ truth or dare game fail అయ్యేది... అంటే నా అర్థం అబద్దం చెప్పే ప్రతి వెధవకి కూడా ప్రేమ అనేది వాడి మనసులో వుంటుంది... వాడు అబద్దం చెప్పాడు కదా అని వాడిది ప్రేమే కాదు అని చెప్పటం పెద్ద డఫ్ఫా లాజిక్. అలాగని అబద్దం చెప్పాలి అనేది కానీ అబద్దాలతో ఎక్ష్ప్రెస్స్ చేసే ప్రేమ మంచిది అని కానీ నా ఉద్దేశ్యం కాదు... ఓవర్ ఆల్ గా ఈ ట్రూత్ ఆర్ డేర్ గేమ్ కేవలం భాస్కర్ గారు ఈ లాజిక్ ని తన క్యారెక్టర్ ఆర్టిస్ట్స్ కి అన్వయించి హీరో గొప్ప అని చెప్పే ప్రయత్నం మాత్రమె)

ఒకరి గుండె లో నిండిన ప్రేమ అర్రలు దాటి బయటకి వస్తుంటే అది ఇంకొకరిలోంచి బయటకి వచ్చే ప్రేమ తో కలిసి వీలైతే వాళ్ళిద్దరికే అందంగా కనిపించే ఫౌంటైన్ లాగా నో, లేక పోతే ఇంకొంత మందికి కూడా పనికి వచ్చే స్ప్రింగ్ లాగానో... లేక పోతే లోక కల్యాణార్థం వచ్చే నదిలా వుంటుంది...తన్మయత్వం తో ఆ నది సత్యం/దేవుడు అనే సముద్రం లోకి జారుకుంటుంది... ఆ నదిలో బ్లూ కాదు... వైటూ కాదు బ్లాకూ కాదు... నిర్మలమైన transparency వుంటుంది (అమ్మో తెలుగు మామూలు లాంగ్వేజ్ కాదండీ... ఈ విషయం ఇంగ్లీష్ లో చాల సింపుల్ గా చెప్పొచ్చు...ఇక్కడ భావుకత భారీ డైలాగుల్లా బయటకి వచ్చింది) ...ప్రేమ INTENSITY కి ORANGE కలర్ వుండటం ఏంటండీ... నా బొంద

ఆ.సౌమ్య said...

#Hmmm
అబ్బ నా పోస్టంత కామెంటు రాసారండీ...ధన్యవాదములు :D
చాలా బాగా చెప్పారు. మీరు చెప్పినవాటిల్లో రెండు పాయింట్లు నాకు బాగా నచ్చాయి

>>అదే సిద్ధాంతాన్ని ఫాలో అయ్యి ఎనిమిది / తొమ్మిది మంది అమ్మాయిల్ని 'నిజాయితీ' తో వదిలివేసిన వ్యక్తే లాస్ట్ లో "కారణాలు తప్ప నాకు ఏమి మిగల్లేదు మొర్రో..." అని వాపోయి ఈ స్వార్థ పూరితమైన (నిజయీతి అటక ఎక్కింది) కారణం వల్ల <<....beautiful....నిజాయితీ అటకెక్కడం, స్వార్థపూరితం..రెండు మంచి పాయింట్లు.

>>నాకు సముద్రమంత ప్రేమ కావలి అని అనటం అనేది మరో వింతైన జబ్బు.<<....well said!

ఆ జెన్నీకి ప్రేమ అంటే అంత పిచ్చి ఏమిటో నాకూ అర్థం కాలేదు...పైగా వికారంగా తోచింది.

మీరు చాలా మంచి వివరణ ఇచ్చారు....రెండవ మరియు మూడవ పేరాలో మీరు రాసిన అంశాలు బాగున్నాయి.

Thanks a lot!

ఎందుకో ? ఏమో ! said...

సంవత్సరం అయిపోయిందని just ఇప్పుడే తెలిసింది
2 or 3 days before మళ్ళీ ఈ movie ని చూసినప్పుడు ఇలా అని పించింది,
ఈ మూవీ కి "ఆర్య-౩" అని పేరు పెట్టి అల్లు అర్జున్ తో చేసి ఉండి ఉంటె commercial hit అయ్యేదేమో అని!
మీరేమంటేరు?
just curiosity కొద్దీ అడుగుతున్నాను ...

?!